اوستاد خئییر-دوعاسی
#اوستاد_رحیم_رئیس_نیا
عزیز ادبیات سئورلر، حرمتلی باجیلار و قارداشلار، تازا ایلینیز، بایرامینیز مبارک اولسون!
سؤز، شعر و... احساس دنیاسینین شهریاری بها بیچیلمز شاه اثری، ادبیات تاریخیمیزین چوخ اؤنملی دؤنوش نقطه‌لریندن اولان، ادبیاتیمیزا یئنی بیر ژانر، حیدربابایه سلام ژانری باغیشلایان دنیا شهرتلی هر بیر آذربایجانلی‌نین، آذربایجان سئورین اوره‌یینین ان ایستی بوجاغیندا یئر آلان شاعریمیز، ۷۶ بنددن عبارت اولان، حیدربابایه سلام منظومه‌سینده آزی ۵ کره بایرام دنیاسینا قاییدیب و بو تاریخی آشا-آشا گلیب بیزه چاتان ملی بایرامیمیزدان، بیزلری، بوتون ایران خلقلرینی، ها بئله بوتون نوروز بایرامنی بایرام توتان خلقلری بیری بیرلرینه باغلایان بایرامدان یاد ائدیب. بو بندلری هامینیز دفعه‌لرله ائشیدیب، اوخوموشسونوز. اوخودوقجادا سئویب سئوینمیشسینیز. من ده ایسته‌دیم بو سئوینجی بیر داها برابر پایلاشاق:
بایرام یئلی چارداخلاری ییخاندا
نوروز گلی قارچیچگی چیخاندا
آع بولولوتلار کؤینکلرین سیخاندا
بیزدن ده بیر یاد ائله‌ین ساغ اولسون
دردلریمیز قوی دیکلسون داغ اولسون.
بایرامیدی گئجه قوشی اوخوردی
آداخلی قیز بیک جورابین توخوردی
هرکس شالین بیر باجادان سوخوردی
آی نه گؤزل قایدادی شال ساللاماق
بیک شالینا بایراملیغین باغلاماق!
شال ایسته‌دیم من ده ائوده آغلادیم
بیر شال آلیب، تئز بئلیمه باغلادیم
غلام گیله قاشدیم، شالی ساللادیم
فاطمه خالا منه جوراب باغلادی
خان ننه‌می یادا سالیب آغلادی!
بایرام اولوب، قیزیل پالچیق ازللر
ناقیش ووروب،اتاقلاری بزللر
طاخچالارا دوزمه‌لری دوزللر
قیز-گلینین، فندقچاسی،حناسی
هوسله‌نر آناسی، قایناناسی
یومورتانی، گؤیچک، گلی بویاردیق
چاققیشدیریب، سینانلارین سویاردیق
اویناماقدان بیرجه مگر دویاردیق؟
علی منه یاشیل آشیق وئرردی!
ارضا منه نوروز گلی درردی....
قایناق: ادبیات سئونلر گروهو
https://telegram.me/dusharge
Post #827
393