Kecha 9-may — "Xotira va qadrlash kuni" munosabati bilan Chunchon shahrida Chunchon O'zbeklar Jamiyati (ChO'J) tomonidan tashkil etilgan futbol musobaqamiz qizg'in baxslar, samimiy muhit va ko‘tarinki kayfiyatda o‘tdi.

Musobaqa davomida qiziqarli, murosasiz va o‘ziga xos uchrashuvlar bo‘lib o‘tdi. O'ndan ortiq Koreyaning turli shaxarlaridan tashrif buyurgan jamoalar maydonda g‘alaba uchun munosib kurash olib bordi, tomoshabinlar esa musobaqani katta qiziqish va hayajon bilan kuzatib bordilar.

Ishtirokchilarning bo‘sh vaqtlarida ham tadbir yanada jonlandi — ular o‘rtasida arqon tortish va tosh ko‘tarish bo‘yicha bellashuvlar tashkil etildi. Bu esa musobaqaga nafaqat sport ruhi, balki do‘stona hamjihatlik va ko‘tarinki kayfiyat ham olib kirdi.

Tadbirda bir qator hurmatli mehmonlar ham ishtirok etdilar. Jumladan, O‘zbekiston Respublikasining Koreya Respublikasidagi Elchixonasi birinchi kotibi, Koreya Politsiya agentligining mas’ul xodimi, Tashqi mehnat migratsiyasi tizimidan bir necha vakolatli vakillar, shuningdek Coinshot xalqaro pul o‘tkazmalari hamda LA KUBA ichimliklari kompaniyalarining rasmiy vakillari tashrif buyurdilar. Ularning ishtiroki tadbir nufuzini yanada oshirdi va xorijdagi vatandoshlarimizni qo‘llab-quvvatlash borasidagi e’tiborning yorqin ifodasi bo‘ldi.

Musobaqa davomida bir qator individual nominatsiyalar ham aniqlandi. Eng yaxshi o‘yinchi, eng yaxshi darvozabon va eng yaxshi gol egasi nominatsiyalari bo‘yicha faol ishtirokchilar taqdirlandilar.
Shuningdek, musobaqani tashkillashtirish va yuqori saviyada o‘tkazishda yaqindan yordam bergan Chunchon O‘zbeklar Jamiyati a’zolari, hakamlar hay’ati hamda volontyorlarga Chunchon O‘zbeklar Jamiyati tomonidan tashakkurnomalar va esdalik sovg‘alari topshirildi.

Musobaqa yakunlariga ko‘ra faxrli o‘rinlar quyidagicha taqsimlandi:
3-o‘rin — FC Palestine (Daegu)
2-o‘rin — FC Neftchi (Anyang)
1-o‘rin — FC Chonho (Seoul)

Mazkur musobaqa xorijda yashayotgan vatandoshlarimiz sport, madaniyat va hamjihatlik orqali yanada jipslashishini yorqin isboti bo'ldi. Bunday uchrashuvlar nafaqat sog‘lom turmush tarzini targ‘ib qiladi, balki o‘zaro hurmat, birdamlik va milliy birlik tuyg‘ularini mustahkamlashga xizmat qiladi.

Chunchon O‘zbeklar Jamiyati kelgusida ham Janubiy Koreyadagi vatandoshlarimizni birlashtiruvchi, ijtimoiy hamkorlikni mustahkamlovchi va O‘zbekistonning jahondagi imidjini yuksaltiruvchi ana shunday mazmunli tadbirlarni davom ettiradi. Birligimiz — kuchimiz, hamjihatligimiz — taraqqiyotimiz poydevoridir.

Chunchon O’zbeklar Jamiyati
Matbuot xizmati

📱Telegram | 🌐Instagram | 🔥YouTube | 🌐Facebook