Sergeli tumanidagi mahallalarda kriminogen vaziyatning oldini olish masalalari muhokama qilindi
Bojxona qo‘mitasi hamda Toshkent shahar bojxona boshqarmasi mas’ullari tomonidan Sergeli tumanidagi “Madadkor” mahallasida fuqarolar ishtirokida kriminogen vaziyatning oldini olishga qaratilgan targ'ibot uchrashuvi o‘tkazildi.
Unda mahallada osoyishtalikni ta’minlash, jamoat tartibiga rioya etish, jamoat joylarida fuqarolarning xavfsizligiga e’tiborni kuchaytirish hamda huquqbuzarliklarning oldini olish masalalariga alohida e’tibor qaratildi.
Yig‘ilish davomida mahalladagi mavjud muammolar va fuqarolarni tashvishga solayotgan masalalar ham o‘rganildi. Jumladan, yo‘l harakati xavfsizligini ta’minlash bo‘yicha fuqarolar tomonidan bildirilgan takliflar muhokama qilindi. Ayrim hududlarda “Signal chalish taqiqlanadi” belgisi o‘rnatilganiga qaramay, haydovchilar tomonidan ushbu talabga rioya etilmayotgani qayd etildi.
Shuningdek, maktab joylashgan ko‘chada transport harakatini bir tomonlama tashkil etish, mahalla hududidagi kuzatuv kameralarini ko‘paytirish hamda xavfsizlikni ta’minlash bo‘yicha qo‘shimcha choralarni ko‘rish masalalari yuzasidan takliflar bildirildi.
Uchrashuv yakunida mahallada huquqbuzarliklarning oldini olish, jamoat tartibini ta’minlash hamda fuqarolarning murojaat va takliflarini o‘rganish borasidagi ishlarni hamkorlikda davom ettirish yuzasidan vazifalar belgilab olindi.