🍎🏃📚✏️
 
#همت‌شهبازی
 
سئوگی قوشو «بوتیمار»  
«بوتیمار» دیوان ادبیاتیمیزدا «سئوگی قوشو» سیمبولونو داشییان قوشدور. اوْنا هم ده «غم قوشو» دئییلیر. بونلارین هر ایکیسی اوْنون حیاتی ایله باغلی‌دیر. چوٌنکی بو قوش سئوگی ایله باغلی هم ده انسانین حیات یوْلوندا چکدییی عذابلاری تجسّم ائتدیریر. بو قوش، دنیز سئودالیسی‌دیر؛ آنجاق قورخور کی، اگر دنیزدن سو ایچسه، دنیز قورویار. باشقا سؤزله، دنیز سویونون قایغیسینی چکدییی اوٌچون هر زامان اوْنون سویونون قورتاراجاغیندان نیگاراندیر. اؤز سوسوزلوغونو بیر قورتوم دنیز سویوندان ایچمکله آرادان قالدیریر، اما هر گوٌن سویون قورتاراجاغیندان قورخدوغو اوچون بیر قورتومدان آرتیق ایچمیر. او، دنیز ساحلینده کئشیک چکیر، اونا ائله باخیر کی، سانکی سئوگیلیسینه باخیر. او سئوگیلیسی‌نین گله‌جه‌ییندن نیگاراندیر. بو سبب‌دن بوتیمار دیوان شعرینده یئرسیز تشویشین، خسیس‌لیین، اؤزونو عبث یئره عذاب ایچینده ساخلاماغین و بیتمه‌ین قایغی‌نین سیمبولودور. دیوان ادبیاتیمیزدا «غم عشق» ایفاده‌سینی بو قوشون حیاتیندا تاپماق اوْلار. سئوگی یوْلوندا قایغی چکیر، اؤزونو غم-غصه‌یه وئریر. بو اوبراز اوْخوجویا سئوگی‌نین هم گؤزل، هم ده عذاب دوْلو اوْلدوغونو گؤستریر. بس نئجه اؤلور؟ سوسوزلوقدان. دنیز سویونون قورتاراجاغیندان قوْرخان بو قوش، اوْندان ایچه بیلمه‌دییی اوٌچون اؤلور. بو، سئوگی یوْلوندا چکیلن عذابین سیمبولودور.
 
عمادالدین نسیمی یازیر:
 
صفاسیز صوفی دایم قایغولودور،
بو معنید‌ن کی، بوتیمارا بنزر.
      (نسیمی دیوانی، ص 253)
 
بئیت انسانین ظاهری دیندارلیغی‌نین کیفایت ائتمه‌دیینی وورغولاییر. شاعر دئییر کی، حقیقی معنوی راحاتلیغا چاتمایان، دایم دونیا و یا نفسی ایله مشغول اولان صوفی هئچ واخت آرخایین اولا بیلمیر. او، بوتیمار کیمی هر زامان بیر قورخو و ناراحاتلیق ایچینده یاشاییر. نسیمی صوفینی بوتیمارا بنزتمکله دئییر کی: صوفی ظاهرده زاهیدلیک ائدیر، اما داخیلده راحات دئییل. او، همیشه قورخو، شوبهه و نیگاران‌چیلیق ایچینده یاشاییر. نئجه کی، بوتیمار سویون ایچینده یاشادیغی حالدا سوسوز قالیر، ائله‌‌جه ده بو صوفی معنوی حقیقته یاخین اولدوغو حالدا اوندان فایدالانا بیلمیر. اؤز دوشونجه‌لری و قورخولاری اونا راحاتلیق وئرمیر.
 
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش                                                                                    
                                                  #تورکجه_یازاق_ائلنن_قالاق                                                                             
                                                  #کیملیییمیزه_بیرگه_دالاق
╰••••••••••••••••••••••••••••••••╯