🍎🏃📚✏️
 
ایستمیرم یار آغلاسین چال تاری قوْی تار آغلاسین
گوٌل اوْیناسین خار آغلاسین، بوْغاز گوٌلسون دار آغلاسین
 
قوْی یئره غم پیاله سین، سیل گؤزونون شلاله سین
 آل گونشین حواله سین، شاخ قارا قوْی قار آغلاسین
 
یار نه دن آغلاسین گرک؟ بوْیون بوٌکولسون آی فلک
 دوْیونجا قوْیمادین گوٌله ک، سیخ ناری قوْی نار آغلاسین
 
خزان یئلی اَسَن زمان، شخته امان کَسه ن زمان
یار یاریلان کوٌسه ن زمان، کیمسه کیمیم وار آغلاسین
 
توْزدو دوماندی فیرتانا، اوْد یاغیلیب گوٌلوستانا
دؤنده ر اوٌزون شبستانا، ساغره یالوار آغلاسین
 
صوٌبحه تیکیلدی گؤزلریم، داغلاری آشدی سؤزلریم
گیزلین آلوْودو کؤزلریم، نئی اؤلدو نیزار آغلاسین
 
ساقی گتیر قدح لرین، سرخوْش اوْلاق دَرین دَرین
سئوگی توتا کینین یئرین، کین اؤزو زار- زار آغلاسین
 
دریالارا اوزان آراز، جوم درینه قالما دایاز
مرکّب اول سؤزلری یاز، داغ دا بولاق لار آغلاسین
 
✍️محمودقبه‌زرین(آراز) (https://t.me/Orhsoz)
 
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش