🍎🏃📚✏️
78-جی درس
فعل (7)
تأثيرلى و تأثيرسيز فعللر " گئچیشسیز (لازيم) و گئچیشلی (متعددى)":
"سولماز مكتوبو يازدى" جومله سينده ايشى گؤرن "سولماز" دير, "يازدى" فعلدير. بورادا "يازدى" ايشينين نتيجه سى واسيطه سيز "مكتوب" سؤزونون اوٌستونه دوٌشور. ايشين (فعلين) نتيجه سى واسيطه سيز اوٌستونه دوٌشن سؤزه "واسيطه سيز تامامليق" دئييلير. چوٌنكى ايشين نتيجه سى اوْندا تاماملانير.
واسيطه سيز تامامليق طلب ائدن فعللره تأثيرلى فعل دئييلير. بونا گؤره ده واسيطه سيز تامامليق تأثيرليك حاليندا اوْلار.
"آيدين قاچدى" جومله سينده "آيدين" ايشى گؤرن و "قاچدى" فعلدير. بورادا "قاچدى" فعلينين تأثيرى "آيدين"ين اؤزونده قالير و آيرى بير شئيين اوٌستونه دوٌشمور. باشقا سؤزله, فعلين معناسى ائله دير كى, اوْنون تأثيرى ايشى گؤرنده قالير و واسيطه سيز تامامليق ايسته مير. بئله فعللره تأثيرسيز فعل دئييلير. تأثيرلى فعللر نه يى؟ , كيمى؟ و نه؟ سواللارينا جاواب وئره بيلديكلرى حالدا, تاثيرسيز فعللر بو سواللارين هئچ بيرينه جاواب وئره بيلمز.
گلمك, گئتمك, قاچماق, ياتماق, باتماق, دورماق, ... فعللرى تأثيرسيز, گؤرمك, اوْخوماق, آلماق, آپارماق, ... كيمى فعللر تأثيرلى فعللردير.
آنجاق دئييلمه ليدير كى, تأثيرلى و تأثيرسيز فعللر آراسيندا سد چكمك اوْلماز, اوْنا گؤره كى ائله فعللر واردير كى, ايشلنديكلرى يئرله باغلى تأثيرلى يا دا تأثيرسيز اوْلا بيلر. ميثال اوٌچون "من بازارا گئتديم" و "من يوْلومو گئتديم" جومله لرينين بيرينجى سينده "گئتديم" فعلى تأثيرسيزدير, اوْنا گؤره كى, "نه يى؟, كيمى؟ و نه؟" سواللاريندان بيرينه جاواب وئره بيلمير. آنجاق ايكينجى جومله ده بئله سوْروشماق اوْلار: من نه يى گئتديم؟ _يوْلو گئتديم. باشلاماق, ايشله مك, اوْخوماق و ايشلتمك فعللرى ده بئله دير.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5373
33
- 👍 1