🍎🏃📚✏️

77-جی درس
فعل (6)
فعلين اينكارليغى
فعللرين بير خصوصيتى ده اوْنلارين اينكارليق آنلامينا ماليك اوْلمالاريدير.
ايش و حركتين ايجرا ائديلديگينى گؤسترن فعللره تصديق, ايجرا ائديلمه مه سينى بيلديرنلره ايسه اينكار فعلى دئييلير.
اينكار آنلامينين علامتى "ما-مه" دير كى, بوٌتون اکلردن اؤنجه, فعلين كؤكونه ياپيشار.
اينكار علامتلرى وورغو آلتينا دوٌشمز, وورغولار اوْنلاردان قاباقكى هئجالاردا اوْلار.
بو اينكار اکلرينى فعللردن ايسيم و صيفت دوٌزلدن "ما-مه" شكيلچيلرى ايله قاريشديرماماليييق. اينكار علامتلرى وورغو قبول ائتمه ديكلرى حالدا, بو اکلر وورغو آلتينا دوٌشر.
ديليميزده اينكار علامتى بيلديرن بير ده "نه" باغلاييجيسى واردير كى, تكجه فعل دَييل, بوٌتون نيطق حيصه لريله ايشلنر. بو باغلاييجى اينكارليق و منفيليك مضمونو يارادير:
نه ياتير, نه ده اوْتورور. نه من, نه ده سن. نه چوْخ, نه ده آز.
دوٌنيا ديللرينين هاميسيندا اينكار آنلامى واردير, آنجاق اوْنلارين چوْخوندا بو آنلامين علامتى فعلين اوّلينده اوْلور, آمما بيزيم ديلده بو علامت فعللرين سوْنونا گلر. آنجاق ديليميزده كى "نه" باغلاييجيسى باشقا ديللرين اينكار علامتينه اويغوندور.
دیلیمیزده فعللردن اؤنجه "نه" باغلاييجيسى ايشلنديكده, اينكار علامتى گلمز, اونا گؤره كى, "نه" اينكار علامتينى دييشير: ميثال اوچون: نه ايچرى گلير, نه ده قويوب گئدير... جومله سينين معناسى بئله دير: ايچرى گلمير و قويوب گئتمير.
معاصير ديليميزده بعضى يازارلارين طرفيندن هم "نه", هم ده اينكار علامتى ايشلنير: نه اؤلمور, نه ديريلمير. آنجاق دئييلمه ليدير كى بو دوٌزگون دَييلدير.
قئيد ائتمك لازيمدير كى, ايكى اينكار علامتى, هم "نه-دَييل" هم ده "ما- مه", بير جوٌمله ده اوْ زامان ايشلنه بيلر كى, رياضيات كيمى, ايكى اينكار بير تصديق معناسى وئرسين: ايسلامى حكومت محكوم ميللتلرين ديللرينين آزاد اوْلماسينين ضرورتينى حيس ائتمه ميش دَييلدير.
بونلاردان باشقا ديليميزده "يوْخ" و "سيز" كيمى منفيليك مضمونو داشييان سؤزلر ده واردير كى باشقا نيطق حيصه لرى اوٌچوندور.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯