🍎🏃📚✏️
✍️فاطمه عبدی _ کؤنول
چیراغیم، یان!
سال ایشیق، قوْی یوخولو گؤزلر اوْیانسین،
یوخویا وئرمیش اؤزون اوٌزلر اوْیانسین،
گوٌنوموز سوٌد کیمی آغ رنگه بوْیانسین،
گئجه بیر آز دا یوبانسین،
آییمیز گوٌن‌له باریشسین،
گئجه، گوٌندوزله قاریشسین!
سال ایشیق، بلکه حیاتیم ایشیق اوْلسون!
چیراغیم، یان!
یوْلونو آزمایا یوْرغون یوْرولان‌لار!
یان‌گینان، اوْلمایا بیر ده یاری یوْلدا سوْیولان‌لار!
گوٌنش ایله ایشیغین قات، یاشا داغلار قوجاغیندا،
آلوْوا قات اؤزونو، یان سوْیوق ائولر بوجاغیندا،
ایسینه قوْی هَنیرین‌له سوْیوق ال‌لر اوْجاغیندا!
داها یئللر ده سنی سؤندوره بیلمز.
چیراغیم، یان!
ایشیغین بیر ده یارانسین،
قوْی قارانلیق دئوی بو سؤنمز ایشیق‌لاردان اوتانسین!
آچ گوٌنش‌تک ساچینی گؤیلره،
قوْی عالم اوْیانسین!
«کؤنول»و قوْیما قارانلیق آلا سندن!
بیر قیزیل تئل کیمی ساخلا،
قوْیما کیمسه یوْلا سندن!
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5192
45
- ❤ 1