Respublika hududida o‘tkazilayotgan "Qidiruv" tezkor tadbiri doirasida jinoiy javobgarlikdan qochib, yashirinib yurgan qidiruvdagi shaxslarni aniqlash va qonun ustuvorligini ta'minlash bo‘yicha tezkor harakatlar izchil davom ettirilmoqda.

Xususan, joriy yilning 11-oktabr kuni olib borilgan tadbirlar davomida, O‘zbekiston Respublikasi Jinoyat kodeksining 277-moddasi 3-qismi hamda 165-moddasi 3-qismida ko‘rsatilgan jinoyatlarni sodir etib, tergovdan yashiringanligi sababli Buxoro tumani IIB huzuridagi Tergov bo‘limi tomonidan joriy yilning 25-sentabr kuni qidiruv e'lon qilingan fuqaro — Kogon shahar, "Buxoroi Sharif" MFY, Azizobod ko‘chasida yashovchi, 1985-yilda tug‘ilgan Sh. F. ning yashirinib yurgan manzili aniqlandi.

Kogon shahar IIB TQX JQB hamda Qo‘riqlash xizmati 2-TQM mas'ul xodimlari tomonidan hamkorlikda olib borilgan tezkor-qidiruv tadbirlari natijasida, qidiruvdagi ushbu shaxs Kogon shahri hududida qo‘lga olindi.

Hozirgi vaqtda mazkur shaxsga nisbatan "qamoq" ehtiyot chorasi qo‘llanilib, tergov hibsxonasiga joylashtirildi.