Таълим тизимидаги ҳамкорлик ва устувор вазифалар муҳокама қилинди

Бухоро давлат педагогика институтида вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Бахтиёр Адилов иштирокида учрашув бўлиб ўтди. Унда институт ректори Баҳодир Маъмурoв, вилоятдаги олий таълим муассасалари вакиллари, туман ва шаҳар ҳокимларининг ўринбосарлари, мактабгача ва мактаб таълими бўлимлари мудирлари ҳамда соҳа масъуллари қатнашди.

Учрашувда таълим тизимининг турли босқичлари ўртасидаги узвийликни таъминлаш, таълим муассасалари фаолиятини мувофиқлаштириш ва ўзаро ҳамкорликни янада мустаҳкамлаш масалалари муҳокама қилинди.

Мулоқот давомида педагог кадрлар тайёрлаш сифатини ошириш, бўлажак ўқитувчиларнинг касбий компетенцияларини ривожлантириш, замонавий педагогик ёндашувларни амалиётга жорий этиш ҳамда таълим муассасалари ва ҳудудий ташкилотлар ўртасидаги ҳамкорликни кенгайтиришга алоҳида эътибор қаратилди.

Шунингдек, туман ва шаҳарларда таълим сифатини ошириш, мавжуд муаммоларни ҳамкорликда ҳал этиш, илғор тажрибаларни оммалаштириш ҳамда ёшларнинг билим олиши ва камол топиши учун зарур шарт-шароитларни яхшилаш юзасидан фикр алмашилди.

Учрашув якунида таълим соҳасида белгиланган вазифаларни самарали амалга ошириш, масъул ташкилотлар ўртасидаги ҳамкорликни кучайтириш ва таълим-тарбия сифатини оширишга қаратилган ишларни изчил давом эттириш муҳимлиги таъкидланди.

👉Бахтиёр Адилов канали