Араб тили ва Уммон маданияти — халқаро тажриба ва ёндашувлар

🗓2026 йил 16 сентябрь куни Уммон Султонлигининг Тошкентдаги элчихонасида "Уммон Султонлигининг араб тилини ва Уммон маданиятини дунё бўйлаб бошқа тилларда сўзлашувчиларга ўргатишдаги ўрни» мавзусида тадбир бўлиб ўтди.

Тадбир доирасида араб тили ва Уммон маданиятини бошқа тилларда сўзлашувчиларга ўргатиш соҳасида 18 йилдан ортиқ тажрибага эга, мазкур йўналиш бўйича магистр даражасини олган, Европа, Осиё ва Америкадаги қатор университетларда фаолият юритган мутахассис устоз Ҳузайм бин Муҳаммад ал-Манийъий маъруза қилди.

Маърузада араб тилини ўқитишнинг замонавий усул ва ёндашувлари, Уммон Султонлигининг араб тили ҳамда миллий маданиятини халқаро миқёсда тарғиб қилиш борасидаги тажрибаси, шунингдек, маданий-маърифий ҳамкорликни ривожлантириш масалалари муҳокама қилинди.

Тадбирда Уммон Султонлигининг Ўзбекистондаги Фавқулодда ва мухтор элчиси Вафо Жабр Носир ал-Бусаидий хоним, Ташқи ишлар вазирлиги ходимлари, юртимиздаги олий таълим муассасаларининг араб тилига ихтисослашган факултет талабалари ҳамда Уммон Султонлигида таҳсил олган юртдошларимиз иштирок этдилар.

Тадбир якунида араб тили ва Уммон маданиятини ўрганиш, таълим соҳасидаги тажриба алмашинувини ривожлантириш ҳамда икки давлат ўртасидаги маданий-маърифий алоқаларни янада кенгайтириш масалалари юзасидан фикр алмашилди.

@BintuSodiq