🧬 Радыё Свабода: у палітвязняў, сваякоў журналістаў і палітэмігрантаў ужо збіраюць ДНК

Стала вядома, што ў Беларусі рыхтуюць стварэнне агульнай базы ДНК грамадзян. Ініцыятарам выступіў Камітэт судовых экспертыз, а ідэю ўжо падтрымліваюць сілавыя структуры і дзяржаўныя органы.

Але падобная база можа выкарыстоўвацца не толькі дзеля расследавання рэальных злачынстваў, але для кантролю над грамадствам.

Паводле публікацыі Радыё Свабода, рэжым ужо збірае ДНК у няўгодных яму людзей, хоць для гэтага няма прававога рэгулявання. Прычым часам гэта робіцца з выкарыстаннем падману, хлусні або пагрозаў.

Адзін з журналістаў распавёў, што следчыя прыехалі да яго маці ў вёску і ўзялі сліну, заявіўшы: «Калі з вашым сынам нешта здарыцца, так яго лягчэй можна будзе апазнаць». У іншым выпадку бацькам журналісткі, якая жыве за мяжой, заявілі, што возьмуць іх ДНК замест яе, а на пытанне пра адмову адказалі: «Яны ўсё адно возьмуць у іх аналіз».

Паводле экспертаў, стварэнне падобнай базы можа стаць узаконьваннем практыкі, якая ўжо фактычна існуе.