У Вільні абмяркуюць кнігу пра дзяцей ахвяр сталінскіх дэпартацый

16 кастрычніка ў Вільні ў межах фестывалю інтэлектуальнай кнігі «Прадмова» адбудзецца дыскусія з нагоды выхаду кнігі «Трэскі лятуць. Дзеці спецпасяленцаў: Беларусь — Котлас — Беларусь».

Кніга прысвечана наступствам раскулачвання і прымусовых дэпартацый у СССР. У цэнтры даследавання — лёсы людзей, якія перажылі рэпрэсіі, і іх дзяцей.

Як савецкая ўлада ператварала цэлыя сем'і ў «вінаватых»? Як досвед выгнання і жыцця на спецпасяленні ўплываў на наступныя пакаленні? Якую ролю адыгрывае памяць пра перажытае ў барацьбе за годнасць і справядлівасць?

Даследаванне паказвае, як траўма дзяржаўнага гвалту перадаецца праз пакаленні, а захаванне сямейнай памяці становіцца формай супраціву забыццю.

Удзельнікі дыскусіі: Ірына Раманава — гісторык, аўтарка кнігі; Ціхан Чарнякевіч — літаратуразнаўца і даследчык гісторыі беларускай культуры.

📅 16 кастрычніка, 18:15–19:00
📍 Tautinių bendrijų namai (Дом нацыянальных супольнасцей), Raugyklos g. 25, Вільня