У Вільні ўсталююць памятную шыльду на магіле сакратара Віленскай беларускай гімназіі Уладзіміра Лукашэвіча

3 кастрычніка а 10:00 Беларускі праваслаўны прыход у Вільні запрашае далучыцца да добраўпарадкавання магілы Уладзіміра Лукашэвіча на Свята-Ефрасіннеўскіх могілках.

У 1924–1926 гадах Лукашэвіч выкладаў у Віленскай беларускай гімназіі Закон Божы, пазней быў яе сакратаром. У архіўных дакументах ён таксама згадваецца як памочнік класнага кіраўніка і сябра Бацькоўскага камітэта. Яго дачка Раіса была жонкай беларускага грамадскага і палітычнага дзеяча Леаніда Галяка.

Магілу ўдалося адшукаць дзякуючы даследчыку Уладзіславу Гарбацкаму. Старая шыльда сцерлася настолькі, што надпісы ўжо немагчыма прачытаць.

Падчас акцыі ўсталююць новую памятную шыльду, паправяць і пафарбуюць крыж. Месца пахавання асвеціць святар Георгій Рой.

📆 3 кастрычніка
🕙 10:00
📍 Свята-Ефрасіннеўскія могілкі, Liepkalnio g. 19, Вільня.

🔗 Падрабязнасці і геалакацыя — у паведамленні Беларускага праваслаўнага прыхода ў Вільні