Пад Віцебскам выпадкова знайшлі бівень маманта

Падчас правядзення дарожных работ у наваколлях Віцебска будаўнікі знайшлі добра захаваны цэлы бівень маманта (на здымку). Дзякуючы беражліваму стаўленню рабочых артэфакт атрымалася дастаць без пашкоджанняў, паведамляе Інстытут гісторыі.

У жніўні 2023 года паведамлялася, што пры абследаванні акваторыі ракі Бесядзь каля вёскі Свяцілавічы Веткаўскага раёна вадалазы выявілі парэшткі маманта – аднак пра знаходку біўняў тады гаворка не ішла.

Усяго ў Беларусі налічваецца каля 200 месцаў, дзе знаходзілі парэшткі мамантаў. Верагодна, самая каштоўная знаходка была зроблена ў 2008 годзе, калі на ўскраіне Мінска на вуліцы Машынабудаўнікоў у пясчаным катлаване выпадкова знайшлі «могілкі» мамантаў.