Зылаԥшҳәаа ҭбааз, абаҩхатәра злаз арҿиаҩы, адырреи, аламыси, ақьиареи змаз ауаҩы — абас ихцәажәоит ихааныз, ибзианы дыздыруаз ауаа.
Сарион Ҭаркьыл занааҭла дфилологын, Аҟәатәи арҵаҩратә институт далгеит, анаҩс — Москва, Горки ихьӡ зху Алитературатә институт. Аус иуан Аԥсны еицырдыруа агазеҭқәеи ажурналқәеи рредакциақәа рҿы, аамҭала "Алашара" аҭакзыԥхықәу амаӡаныҟәгаҩс дыҟан. Жәохә шықәса инарзынаԥшуа ахәыҷтәы журнал "Амцабз" аредактор хадара ныҟәигеит (1989 - 2004). Ари аҭыжьымҭа иџьабаа рацәаны иадиҵеит.
Уи аредакциаҿ даныҟамыз, есымша атипографиаҿ дҭагылан, иҭахын "Амцабз" ахәыҷқәа ианаамҭоу ироуларц, иаргәырӷьаларц. Аимадара бзиаӡа рыман Аԥсны ашколқәа зегьи иара иредакциеи. Уи ихьӡала ирацәаны асалам шәҟәқәа аарышьҭуан ахәыҷқәа. Убри азоуп иаргьы урҭ бзиа изибоз, дызрыхӡыӡаауаз, ахәыҷы иҿы дхәыҷын, ахәыҷы игәы иман, уи дицхәмарыргьы илшон. Иԥсра ҩымз шагыз Аԥсуа бызшәа аҿиара афонд иҭнажьит уи иԥсы злаз, ахәыҷқәа ирзикыз ашәҟәы "Ахҭыс шанақәа", — ҳаԥхьоит Анатоли Лагәлаа игәалашәарақәа рҿы.
Сарион Ҭаркьыл апоезиа аизга ссирқәа ааба дравторуп. Иаамҭа даҿахәҳәаҩын, уаҵәтәи амш лаша ухирԥшылон. Асахьаркыратә литература иԥсы алан, агьама бзиаӡагь иман. Ихатәы рҿиамҭақәа рнаҩс, аԥсшәахь еиҭеигеит Ахматова, Бальмонт, Хлебников, Клиуев уҳәа егьырҭ аурыс поетцәа ражәеинраалақәа. Иахьатәи аԥсуа литературатә бызшәа аихьӡарақәа иамоу ихәҭаа ду алоуп. Хашҭра иқәымзааит!
🧡 Ахьыуардын шәақәтәа