✍️ :ائلمان_موغانلی

پاییز گلدیگینده
دونیا همه‌شه‌کیندن آستا
اؤزوندن واز کئچمه‌گه باشلار

آرالاریندا کوسگون‌لوک اولمادان
یاپراق‌لار آغاج‌دان دوشر
و من دوشونورم بلکه ده سئوگی‌نین بوتون فلسفه‌سی ائله بودور:
گئتمک
سئومک سونا چاتمادان.

سنی سئویرم
سئودیک‌لرینی آیا بنزه‌دن اَسکی شاعیرلره تای یوخ.
غریب بیر اؤلکه‌ده
یوز ایل‌لردن سونرا
بیردن آنادیلینی ائشیدن بیر اینسانا تای
سئویرم سنی.

دونیانین نئچه کره سونا چاتماغی
هئچ ده اؤنملی دئییل
بیر پاییز گون‌باتیمیندا
سنه بیر کره باخماق ایمکانی
هله واردیرسا.

بوراخ‌ فیلسوف‌لار دونیانین آنلامسیز اولدوغونو آنلاتسینلار
من بوتون تئوری‌لرین ایچیندن
بو سونوجا چاتمیشام:
سن اولماسایدین
پاییز ساده‌جه بیر مئوسیم ایدی
گلیشینده یاپراق‌لار آغاج‌دان آیریلیردیلار.

آمما ایندی
هر دوشن بیر یاپراق
مندن سنه گؤنده‌ریلن
سئوگیسل بیر یازی‌دیر.

مدارلارین یوخوموزا آخدیغی عصیرده
آدین گلنده
اوره‌ییم اَسیر.


https://t.me/Adabiyyatsevanlar