اورمو گؤلو ایله گؤروش
حسین مصری

قاپیمی دؤیدون
آچیق ایدی قاپیم
آناحتارینی ایتیرمیشدیم
گؤزیاشلاریمین دیده‌رگین‌لیینده.
قاپیم آچیق
بویور گؤزلریم اوسته ایلش
دوزلاغا دؤنموش جادار-جادار بنیزلریم
گئجه یاری، هامی یاتمیش
آغلاماق ساعاتی بورادان باشلاییر
گل!
گل!
سنه آغلاریق بوگئجه
میصراع -میصراع
هؤنکورتو تمپوسوندا
وامپیرلر
گونشدن اوتاناراق
اؤلدوردوک‌لری
جسدلره آغلارکیمی.
اوفوقلار بوشلوقلا دولو
دؤردبیر یانیمیز
یاری جان ّ
یاری اؤلو
.
گل سنه آغلاریق
بیرده گمی‌لرده هالای چکیب
دالغا-دالغا
باغریمیزا باساریق
ساحیل‌لری
داها
بؤلونمه‌ریک
شیریم -شیریم
دؤردسمته -دؤردیانا.
گل سنه آغلاریق
اللریمیزده یالنیز اومودقیرینتیلاری
و دیزلریمیزده
سانجی دولو
بیرآزاجیق ته‌پر.
گل !
صاباحا بویلاناق گیزلیجه
کیم گؤره بیلر بیزی
بوگئجه‌نین یاریسی
یوخ !
یوخ!
دایان
دور بیرآن
یاهالدیم
گؤزلر یالان سؤیلر
جسد-جسد، یان -یانا
یوخولاریندا فلامینگو اوچوشو
قاناد -قاناد
اسکی تورکویه چئوریلیب ایندی.
گؤز آچدیغیمیز بو شهرده
داها بیزیم دئییل
داها سن دنیز دئییلسن
داها
من ،من دئییلم
بیر لال داشام آذربایجان بویدا.

2 ایلک و سون کابوس

موتسوزلوق
سنسیزلیین
هرگون اورتا چاغی‌نین
آجی قاتقیسی
وهرگئجه‌نین
ایلک و سون کابوسو.
سنسیزلیک
موتسوزلوغون
اوجقار
وچوراق اؤلکه‌سی.
آیریلدیق بیز
گؤروشمه‌دن اؤنجه
ایلک دؤرد یول آیریمیندا
یارانمامیشدی الوداع سؤزجویو اوندا.
تسللی اولسون دئیه
طالع‌له باریشدیم
یانلیش آدرس‌لره یوللاندیم
شیفره‌لی قاپیلاری چالدیم
زامان دا دایانمیشدی
من شعیر یازیردیم
ومین بیر آجینی چکمه‌یه
قافیه آختاریردیم
حیات ردیفلی، شعیرلریمه
وسنین گلیشینی
بیراومو ائده‌رکن
اوره‌ییمدن گؤزلریمه قدر
هیجا – هیجا یالواریردیم.

https://t.me/Adabiyyatsevanlar