اوشاق ادبیاتی

سئحیرلی اوزوک 
دوردونجو ناغیل : 
« ننه نین گؤز یاشلاری » 
یازان: علی صمدلی
کؤچورن: علی آغ گونئيلی ــ ابرازی 
کتاب:‌ ژنرالین اوشاقلیغی « پووئست لر بؤلومو»
ننه احمدی یولا سالیب، ائو ائشییی ییغیشدیردی .سوقابلارینی بولاق سوایله دولدوروب آرخاینلاشدی . ائوین باش طرفینده اوزاتدیغی خالچانین اوستونده کی خارال اؤرتویو گؤتوردو . توخونوب قورتارماقدا اولان خالچانین گؤزه ل و رنگا رنگ ناخیشلاری کاسیب کومایا ایشیق ساچدی . ننه اونو قابارلی اللری ایله تومارلادی . ناخیشلارینا دیقتله باخدی . دونندن بویاییب حاضیرلادیغی رنگلی ساپ یوماقلاری دیزلرینین آراسینا قویوب خالچایا یئنی ناخیشلار سالماغا باشلادی . همیشه کی عادتیله بایاتی دئدی .
ننه خالچانین ناخیشلارینی ساییر ، یوز بیرینجی رنگلی ناخیشی وورماغا تلسیردی . 
بیردن گؤی گورولدادی ، ایلدیریم چاخدی .عالم بیر آن ایچینده ظولمته دؤندو . دیو نریلتیسیندن قولاق توتولوردو. قاپیلار تای با تای آچیلدی . ننه قورخوسوندان بیر کونجه قیسیلدی . بیر قارا ، هیبتلی ال خالچانی خانادان قوپاریب آپاردی . 
ننه نقدر چیغیردی ، باغیردی سسینی ائشیدن اولمادی . دیو چکلیب گئدن کیمی ، هر شئی ساکیتلشدی، ایشیقلاندی . ننه هؤنکور – هؤنکور آغلادی . 
احمد مئشه دن قاییداندا ننه سینی بو حالدا گؤروب دئدی :  
ــ  ننه جان، سؤیله گؤروم نه اولوب ؟ ائو ـ ائشییی کیم بو گونه سالیب؟!
ــ کیم سالاجاق،  آی اوغول، آغ دیو کيچن ایلکی کیمی ، نریلتی ـ گورولتو ایله هر شئیی چالیب ـ چاپیب آپاردی . هر شئی جهنمه ، خالچا الیمدن چیخدی . بیر نئچه گونه توخویوب قورتاراجاغدیم .
احمد ننه سینین قابارلی وقیریشلی اللریندن توتوب دئدی:
ــ ننه،  فیکیر ائلمه . گئج ـ تئز خالچانی گئری آلاجاغام . آغ دیوله ووروشا گئده جیم .اؤزوده تک باشینا یوخ ، اؤزومه اعتبارلی دوستلار تاپاجاغام . 
احمد دانیشدیقجا قضبدن یوموروقلاری دویونلنیردی . قاشلاری چاتیلیردی . 
بیر قدر دن سونرا ننه قالخیب احمده سفره آچدی . چؤرک گتیردی . سوروشدو: 
ــ اودون گتیره بیلدینمی ، دردین آلیم ؟ 
ــ ننه، ایری بیر شله باغلامیشدیم . یولدا قارشیما السیز ـ آیاق سیز بیر قاری چیخدی . گؤردوم آغلاییر . شوروشدوم ، ــ قاری ننه نه اولوب؟ دئدی کی ، دجل بیر اوغلان گوجله توپلادیغیم چیرپینی گؤتوروب قاچدی . منده اودون شله می اونون کوماسینا آپاردیم.
ــ  چوخ یاخشی ائلمیسن ، منیم بالام . السیز ـ آیاغسیزلارا کمک ائتمک ثوابدیر . یاخشی ، دئمک صاباح ساتماغا اودونونموز یوخدور نئینک ، هئچ فیکیر ائلمه بالاسی، ساباح جوراب وئره رم آپاریب ساتارسان، بازارلیق ائدرسن . احمد چؤره یینی یئدی . آرتیق آخشام قارانلیغی هر طرفی بوروموشدو.او ، یئرینه گیریب ، یورغانی باشینا چکدی.
ــ نه تئز یاتیرسان،  منیم بالام
ــ  ننه، چوخ یورولموشام .
ــ یوخون شیرین اولسون بالاسی . 
ــ  گئجن خئیره قالسین ، ننه جان ... 

https://t.me/Adabiyyatsevanlar