علی رشتبری"قاییب"

شه‌هریم!..بیلمه‌سن قدریمی اگر؛
قویارام خالقینی للیک گئدرم.
توتارام اصلیمین جوت اللریندن
اولارام بیر قارا ملیک گئدرم.

کیمسه نین اورَگی باتماسین پاسا،
کیمسه نین دونیاسی دؤنمه سین یاسا،
گئدنده الیمدن توتان اولماسا،
سوروننم یا الده چلیک گئدرم.

یا اؤزومو وئررم بیر قوشا-قوردا،
یا چاتارام منی درک ائدن یوردا.
آنجاق کی سول گؤزوم قالاجاق بوردا،
اینجیمسم ده باغری دلیک گئدرم.

قاییبین سسینی  ائشیتمه‌دین چون،
نه اوچون چوروتسون بس سنه عؤمرون؟!
قوشولوب اذانین سئحرینه بیر گون،
بو شهردن همیشه‌لیک گئدرم

https://t.me/Adabiyyatsevanlar