پیچیلتی(حیکایه)
یازان :زومرود یاغمور
کوچورن :سحر خیاوی
ایکینجی بولوم
منده یاراتدیغی تأثیر کئچیب گئتدی سونرا، آنجاق آنامین دنیز قوخوسو کئچیب گئتمه‌دی. سیز دنیز قوخوسونو حیس ائتمیسیزمی، نه دئمک ایسته‌دیییمی آنلایا بیلیرسیزمی؟
— حیس ائتمیشم، — اَن سون نیدرلانددا، هاققا شهرینده شیمال دنیزینین ساحیلینده حیس ائتدیییم قوخونو تکرار خاطیرلاییب گولومسوندوم. شیمال دنیزینین ساحیلینده گزیشن آداملاری خاطیرلادیم. اونلارین اوزو پارلاق و حوضورلو ایدی.
— هئچ سیزی سئودییینی سؤیله‌ین بیرینه، اَن یاخین آدامینیزا نفرت ائتمیسیز؟ منه شخصی حیاتینیزدان نَیسه دانیشماغینیزی ایسته‌میرم، ساده‌جه موضوعا گیرمه‌لی‌یم. سیزی گئجه‌نین بو واختی دارتیب بورا گتیرمیشم‌سه، «دانیشماق ایسته‌ییرم» دئمیشم‌سه، موضوعا گیرمه‌لی‌یم، ائله دئییل؟
— ائله‌دیر.
— من آتاما نفرت ائدیردیم. بالاجا اولاندا بئله بونو حیس ائدیردیم و آغلاییردیم. سیزده بئله اولوبمو، سببینی بیلمدییینیز حالدا بیرینه نفرت ائتمیسیزمی، حتّا غضبینیزدن آغلاییبسیزمی؟ اولوب؟ — اوزومه باخیب جواب گؤزله‌ییردی.
هئچ نه آنلامیردیم. حتّا قالخیب گئتمک ایسته‌دیم. آدامین گؤزلرینه باخدیم، سیخ کیرپیکلرله احاطه‌لنمیش گؤزلری ایری و نوفوذ ائدیجی ایدی. ایلک آندا منه سفیل تأثیری باغیشلاسا دا، ایندی ایچیمده اونا قارشی حتّا رغبت حیسّی یارانیر‌دی.
— اولوب، البتّه اولوب. تانیش حیس‌دیر، — دئدیم.
او گولومسونوب سانکی هم‌فیکیر تاپدیغینا سوینیرمیش کیمی راحاتلادی. آزجا قاباغا اَییلیب دوز گؤزلریمین ایچینه باخدی.
— من هله بالاجایکن نانکور اؤولادی‌یدیم، — بونو دئییب دریندن نفس آلیب گولدو. بیر آز اؤنجه دوشوندویومو ایندی او منیم گؤزومون ایچینه دئمیشدی.
— نانکور اؤولادی‌یدیم. بیلیرسیزمی، بو مسئله‌ده والدئینه اعتراض ائده بیلمزسن. چونکی سنی بؤیودوب. بیرجه آنام ائله حساب ائله‌میردی، بیرجه آنام منی دینله‌ییردی. مکتبه گئتمیردیم. نفرت ائتدیییم آتام منه رسم دفتری و بویا قلم‌لری آلمیشدی. بیلیرسیز، بوتون اوشاقلار والیدئین‌لرینین شکلینی چکیر، دونیانین اونلاردان عبارت اولدوغونو دوشونور. آمما سیزه بیر شئی دئییممی؟ اصلینده، ائله بؤیویه‌نده ده دونیا والیدئین‌لردن عبارت اولور، ساده‌جه، بیزیمکی‌لشدیردیییمیز اوبراز‌لاری ایله. اونلارین خاطیره‌لری بئینیمیزین بیر پارچاسینا چئوریلیر و او حیصه‌نی اؤزوموز ظن ائدیریک. مثلاً، من نفرت ائتدیییم آتامین، سئودیییم آنامین پارچالاریندان عیبارتَم. سونرالار آتاما اولان نفرتیمین سببینی آنلادیم. اونون کیمی اولماقدان قورخوردم. دوشونورسونوز کی، بالاجا بیر اوشاق آتاسینین نئجه اولدوغونو هاردان، نجه آنلاییب او یاشدا؟ بیلمیرم. اوّللر او بالاجا اوشاغین نفرتینین سببی آتاسینین چیرکین اولماسی ایدی. آنام کیمی گؤزل بیر قادینین یانیندا بئله بیر چیرکین آدامین اولماسینی ایسته‌میر‌دیم. بیر گون یئنه عئینی شکل‌لری چکیب گوزگونون قاباغینا کئچدیم و گوزگوده اونلارا باخیب غفیلدن آغلادیم. سونرا دا آتامین شکلینی قارالاماغا باشلادیم.
آنام سوسدو. من نَیسه دئمه‌لی ایدیم، آمما ساده‌جه باشیمی ترپدیب یئنه یورغون گؤزلرینه باخدیم. گولومسه‌دی.
من آناما اوخشاییرام... او، همَن گون اوتاغیما گلیب جیردیغیم صفحه‌لری توپلایاندا...
6
نییه بئله ائله‌دیییمی سوروشموشدو. من یئنه آغلاماغا باشلامیشدیم.
— آتام ائودن گئتسین، اونو ایسته‌میرم،- دئدیم.
— آتان سنی چوخ ایسته‌ییر. نییه بو قدر عیبه‌جَر چکمیشسن اونو؟
اصلینده، چکدیییم بوتون شکل‌لر برباد ایدی، بالاجا اوشاق نه قدر قشنگ چکه بیلر کی؟ آمما آتامین شکل‌لرینی قارا رنگله‌میشدیم، ناغیل کیتابلاریمداکی دیولره اوخشاییردی.
— چیرکیندی، اونا گؤره ده چیرکین چکمیشم، — دئییب بورنومو چکنده آنام دیقّتله اوزومه باخمیشدی.
— سن آتانی سئومیرسن؟
— یوخ...
— نییه؟
— چیرکیندی.
همین گون آنام آتامین یاخشی، قایغیکش آدام اولدوغونو؛ من کوچه‌ده یورولاندا منی بویْنونا میندیردییینی دئیه‌نده آلتدان یوخاری اونا باخیردیم. گؤزلری، سیخ کیرپیکلری ائله گؤزل ایدی کی، او آن یئنه آتام کیمی چیرکین اولماقدان قورخماغا باشلادیم.
گئجه‌لر بعضن یاتا بیلمه‌ینده آتامین منیم اوتاغیما قدر گلیب چاتان نفسیندن بئله اییره‌نردیم. بالاجایدیم دئیه آنام هم منیم، هم ده اونلارین یاتاق اوتاغینین قاپیسینی آچیق قویوردو آخی... هر گئجه منه باش چکمه‌یه گلیر، یورغانیمی دوزلدیردی. بعضن اوندان آتامین قوخوسونو حیس ائدیردیم، بونا گؤره همَن آندا آنامدان دا زَهله‌م گئدیردی. بیلیرم، سیز دوشونورسیز کی، اوغلان اوشاقلارینین هامیسی آناسینی آتاسینا قیسقانیر. ائله دئییل. امینم، ایندی تام امینم کی، بو، آنانی آتایا قیسقانماق کیمی بسیط بیر حیس دئییلدی. من آتامی سئومیردیم. ایسته‌میر‌دیم آنامین یانیندا اولسون. آنام هئچ سوغان خوشلامازدی، آتامسا تئز-تئز یئیردی.
Post #30566
339