فریبا ابراهیمی "آفاق"
داریخدی داغ، دره، الله… آغیر یاغیش‌لار اوچون
بولودلار اوخشاما قوشدو ساغیر یاغیش‌لار اوچون
دیکلدی آیریلیق، حسرت، یاخین – اوزاق کدری
سئگاه سیزیلدادی تئل-تئل، فاغیر یاغیش‌لار اوچون
داش اولدو قارداش اوره‌کلر،کسیلدی دوست نَفَسی
چاغیر کی سئوگی اویانسین، چاغیر یاغیش‌لار اوچون
توش اولدوق آغری‌یا، دردی خیسین- خیسین چکیریک
گونش ده آغلاییر آنجاق، یاغیر یاغیش‌لار اوچون
قینیندا تر چیچک‌ایدیک، آچیلمامیش سولوروق…!!
قیفیللانان دوداغیم!!، گل باغیر یاغیش‌لار اوچون
دیدیلدی طالعی، گولمور، سئوینمه‌ییر ائل- اوبام
یاساق اولوب‌مو گولوش، چال- چاغیر یاغیش‌لار اوچون؟
چکیلدی دیل دارا، خالقیم یاد الده شوملانیب هئی
قوواق قوراقلیغی، اولسون اوغور یاغیش‌لار اوچون
گؤزونده سایریشیر اولدوز، سئویملی سئوگیلیمین
قارانلیغی بوغاراق، آی دوغور یاغیش‌لار اوچون
https://t.me/Adabiyyatsevanlar
Post #30563
453