— شراب اولا بیلر، قیرمیزی... — دئدیم و درحال دا بورا گلمه‌یه راضیلیق وئردیییم اوچون اؤزومو قینادیم. تابع اولموش ضعیف کاراکترلی بیری اولدوغومو دوشوندوم، اؤزگوونیم سارسیلدی.
— منی دینلمه‌یه راضیلاشدیغینیز اوچون اؤزونوزو گوناهلاندیرمایین، من سیزین عینادینیزی قیر‌دیغیما گؤره یوخ، سیزینله بوردا اوتورا بیلدیییمه گؤره سوینیرم، — فیکریمدن کئچنلری اوخویورموش کیمی منه تسلّی وئرمه‌سی داها دا حؤوصله‌می دارالتدی.
کافه‌ده حزین موسیقی سسله‌نیردی، پنجره‌دن ساحیل ایشیقلاریندا بَرق ووران دنیز گؤرونوردو. ائله بیل اوستونه بوروشوق قارا اطلس سریلمیشدی. بیزدن بیر آز آرالیدا ایکی گنج اوتوروب کوکتئل ایچیردی. هم راحات، هم ده حوزونلو گؤرونوردولر.
«بو شهرده کیمسه حوضورلو دئییل...»
4
---
— آدیم دنیزدی، — دئییب سؤزونه آرا وئردی، منیم ده آدیمی سؤیله‌یه‌جییمی گؤزله‌دی. جواب آلمایاندا آزجا قاباغا اَییلیب دوام ائتدی.
— قورخمایین، من فالچی دئییلم، خصوصی خیدمت اورقان‌لاریندا دا ایشله‌میرم.
— خصوصی خیدمت اورقان‌لاریندا ایشله‌سه‌نیز ده قورخمارام، فالچی اولسانیز دا، — آزاجیق کنایه‌لی تبسّومله من ده ایره‌لی اَییلیب گارسونون گتیر‌دییی شرابدان بیر قورتوم ایچدیم. دادی ظریف و بیر آز دا تورشودو، تام من ایسته‌دیییم کیمی. شرابی بَیَنمه‌ییم ائله بیل احوالیما سرایت ائتدی و قدحی تکرار قالدیریب بیر اودوم داها آلیب دوز اونون گؤزلرینین ایچینه باخدیم.
او، ویسکینین دادینا باخیب اوزونو تورشوتدو.
— سرتدی، — گولومسمه‌یه چالیشدی، — آمما آلیشمیشام سرت شئیلره. اصلینده، اَن سرت شئی حیاتین اؤزودور، آمما بیز غلیظ شئیلردن یایینماغا چالیشدیغیمیز حالدا اَن آغیر اولانی — یاشاماغی سئچیریك، حیاتیمیز سونلانماسین دئیه اَن آغیر شئیلره قاتلانمالی اولوروق. بونو آنلاماق بیر آز چتین‌دیر... همیشه اسیر دوشرگه‌لرینده، یا دا ایکینجی دونیا ساواشیندا مهاجیرلرین یاشادیغی آغیر شرطلر باره‌ده اوخویاندا دوشونوردوم کی، آخی نییه اینسان بئله یاشاماقدانسا اؤلمه‌یی، مثلاً، باخ بئله‌جه ساکیت، قارانلیق بیر دنیزین سولاریندا ابدی ساکیتلییه چکیلمه‌یی سئچمیر؟ اَن آغیر شرطلرده خیاللار قورور، برک شاختادا بوتون وجودو دوندوغو حالدا بئینی مقاومت گؤستریر؛ دؤیورلر، دیرناقلارینی چیخاریرلار، بدنینه ایستی دمیر باسیرلار، آمما حیاتدا قالماق اوچون دؤزور. نییه دؤزوروک؟ من ده دؤزموشم. بئله دانیشماغیما باخمایین، هامی کیمی دؤزمه‌یی سئچمیشم. سیزده بئله اولوب هئچ؟
باشیملا تصدیق ائدیب دریندن کؤکس اؤتوردوم.
— دوغرودور، موحاریبه‌ده اسیر دوشمه‌میشم، آمما اسیرلییین نسبی وضعیت اولدوغونو دا دئیه بیله‌ریک، چونکی هامیمیز بیر شکلده او وضعیته دوشه بیله‌ریک. بیری فاشیسته اسیر دوشدوگو کیمی، بیز ده اَن یاخین آداملاریمیزا، نازیستلره اسیر دوشوروک، ائویمیز اسیر دوشرگه‌سینه چئوریلیر. اولا بیلمزمی؟ منجه، اولور. هر کسین حیاتیندا بیر اسیر دوشرگه‌سی، یا دا بیر نازیست اولور. بلکه ده اسیرلیکدن خلاص اولانلارین ساغلیغینا ایچمک اولار، — دنیز استهزایلا گولوب ویسکی استکانینی قالدیردی.
قارشیمیزدا اوتورموش ایکی گنج قادین‌دان بیری ایله نظرلریمیز قارشیلاشدی. قادینین بیچیم‌لی آیاقلاری ماسانین آلتیندان گؤرونوردو. دیقّتیمی جلب ائتدییینین فرقینده ایدی. بو اونون عزّت‌نفسینی اوخشاییردیمی، یا یوخ، همَن آندا تام کسدیره بیلمه‌دیم. آمما قادین نظرلرینی قاچیریب دیقّتینی قارشیسیندا اوتوران رفیقه‌سینه یؤنلتمکله منه اؤز یئریمـی گؤستردی. نظرلریمی قاچیرتدیم.
— **آدیمی آنام قویوب. آتاملا بئله راضیلاشیب‌لارمیش. دئییب کی، اوغلوم دا اولسا، قیزیم دا، آدینی دنیز قویاجام. آنام سانتیمانتال قادین ایدی. سیزه بیر سؤز دئیه‌جم، آمما گولمه‌یین. منجه، آنامدان دنیز قوخوسو گلردی. یوخ. من سرسمله‌میرم، یوسون، نفت قوخوسو دئییل، دنیز قوخوسو. اوشاق اولاندا منی دنیزه آپاریردی. مَرده‌کانا. اوردا ساحیل تمیزدیر، دنیزین اؤز قوخوسونو حیس ائده بیلرسن. سو پری‌لری حاققیندا اوخویاندان سونرا اوزون مودّت اؤزومو ایناندیرمیشدیم کی، آنام دا سو پری‌سی‌دیر. اوشاق ناغیللارینین...
5
آردی وار
https://t.me/Adabiyyatsevanlar
Post #30537
415