— باشا دوشورم، فیکیرلشیرسیز کی، گئجه واختی بو سرسم هاردان پئیدا اولدو؟ آمما، بلکه، یاخشی اولدو راستلاشماغیمیز؟ مثلاً، بو گونو گوتوره‌ک – یادیندان چیخمایاجاق، ایللر سونرا خاطیرلایاندا سیزی هیجانلاندیراجاق، یا دا، نه بیلیم، دوشوندوره‌جک بیر شئی اولوب بو گون حیاتینیزدا؟ نسه بیر خاطیره-فیلان؟
— ...
— باخ گؤرورسونوز؟ دئمک، تکجه منه یوخ، سیزه ده لازیمدیر بو صحبت. هئچ اوزاغا دا گئتمه‌یک، بورالاردا بیر یئرده اوتوراق، حسابی من اؤده‌یه‌جم.
پول صحبتینی تکرارلاماسی خوشوما گلمه‌دی، اعتراض ائتمک ایسته‌دیم. آمما بونا حوصله‌مین اولمادیغینی حیس ائدیب سوسدوم. او ایندی منه داها یاخین دایانمیشدی. یورغون گؤزلرینه باخیب باشیملا «یاخشی» دئدیم.
آدینی بئله بیلمه‌دن دینلمه‌یه راضی اولدوغوم بو آداملا اون دقیقه سونرا آرتیق اوز-اوزه اوتورموشدوق. ماسانین اوستونه قویدوغو اللرینه باخدیم، دریسی هامار و پارلاقدی.
— یوخ، بومژ(کوچه‌ده یاشایان ائوسیز آدام) دئییلم... — گولومسه‌دی. اللرینی قالدیریب هاوادا یئلله‌دی. — آمما اولا دا بیله‌رم، هامیمیز اولا بیله‌ریک. یاشادیغیمیز قوتو ائولردن بئزه بیله‌ریک. یا دا اوردا یاشایان یاخینلاریمیز بیزدن بئزیب کوچه‌یه آتا بیلر.
اوزونده یئنه تبسم گؤروندو. گرگین اولدوغونو حیس ائتدیم.
اوتاندیم، اوزوم ایسیندی – یقین، قیزارمیشدیم. بو آداملا باغلی ایکی-اوچ دقیقه‌ده آغلیمدان کئچن بوتون تخمینلرین هامیسی بئینیمه پرچیملنمیش اَن بسیط استریوتیپلردی(پیش داوری).
«بلکه آدام تکدی، کئفسیزدی، دانیشماغا احتیاجی وار؟» بو فیکیر آنجاق ایندی آغلیما گلدی. حالبوکی بو دقیقه‌لرده من اولدوغومدان داها هومانیست دئییلدیم، ساده‌جه قارشیمداکی آدام اللرینی آز قالا گؤزومه سوخاندا آنلادیم کی، ایللر اؤنجه ترک ائتدیییم شهرین ایزلری هله ده ایچیمدن سیلینمه‌ییب. حتّا بیر آز اؤنجه گؤردویوم اینسانلار کیمی دوشونورم، اونلاردان هئچ بیر فرقیم یوخدور. بئینیم قارشیمداکینی آنلاماغا یوخ، ائتیکتلمه‌یه مئیل‌لیدیر. بو فیکیر منلییمی زَده‌له‌دی، اؤز گؤزومده عادیلشدیم ائله بیل. الیمی اوزومه چکیب دریندن کؤکس اؤتوردوم.
— اولا بیلر، دوغرو. هر شئی اولا بیلر، هامیمیز هر شئیی یاشایا بیله‌ریک.
— یعنی دئدیکلریمی تصدیق ائدیرسیز؟
— ائدیرم.
— دئمک کی، صحبتیمیز آلیناجاق.
3
من صحبت ائده‌جه‌ییمیزی دوشونمورم. سیز دانیشاجاقسیز، من دینله‌یه‌جم. بئله ایسته‌دیز.
— یاخشی، او زمان تک باشینا دانیشماغیم داریخدیریجی اولمایاجاق.
بیر آز اؤنجه حیس ائتدیییم دویغونو – عادیلشمه‌نین آجیسینی اوندان چیخارماق ایسته‌ییرمیشجه‌سینه آرخایا سؤیکه‌نیب اوزونه باخدیم. دوداقلاری سیخیلدی، گؤزلرینده آنی غضب پارلادی. حیس اولونوردو کی، داورانیشیم اونو اینجیدیر. یئنه اوتاندیم. تانیمادیغیم بیری‌یلَه ائقو ساواشینا باشلامیشدیم. بئله بیر دورومون ایچینه دوشدویوم اوچون اؤزومه هیرسلندیم، آمما ساکیتلیییمی قوروماغا قرار وئردیم.
— اؤزونوزو قینامایین، من ده عئینی جور دوشونردیم، — او بئله دئینده حؤوصله‌م دارالماغا باشلادی. بو آدام سانکی مودریکلییینی گؤزومه سوخورموش کیمی داورانیردی.
— یعنی منه ده گئجه‌نین بو ساعاتیندا بیری یاخینلاشیب دانیشماق ایسته‌دییینی دئسه، ایصرار ائتسه، سرسری اولدوغونو دوشونردیم. یا دا سیزین بیر آز اؤنجه ائتدییینیز کیمی، پول وئرمک ایسته‌یرم. یعنی ایلک آغلیما گلنلر بونلار اولار. هامیمیز بئله‌ییک. بو بیزیم پیس آدام اولدوغوموزا دلالت ائتمز. بلکه ده اؤزونو قوروماغا غریزه‌دیر. بیلینمزلیک هر زمان قورخولو اولور چونکی. آمما سیزه بیر شئی دئییِم‌می؟ اساس قورخولاسیلار یاخینیمیزداکیلاردیر. سورغولامادیقلاریمیز، سرسری حساب ائتمدیکلریمیز، توز قوندورمادیقلاریمیز. اونلارین ایچینده‌کیلری گؤرموروک. چونکی اعتیبار ائدیریک. سیز اؤز باغینیزدا راحاتسیز، مئشه ایسه همیشه قورخولودور. آمما او باغدا اَن سئودییینیز آغاجین دیبینده دینجلنمک ایسته‌ینده سیزی ایلان چالا بیلر. گؤونمک گوناه دئییل. گؤونمک نرمالدیر. قورخوروق، چونکی بیر-بیریمیزه چوخ پیسلیک ائتمیشیک. سیز و من یوخ، عومومن. اینسان اینسانا تهلوکه‌دیر. حیات بیزی بئله کودلاشدیریب – بیر-بیریمیزدن قورخماغا... بئینیمیز بونا آلیشدیریلیب، بئیین ده کی آلیشدیقلاری ایله یاشاماغی سئویر. خیال کیمی گؤزل اولان بیلینمز‌لر، گرچکلرینی بیلدیییمیز پیسلیکلردن داها چوخ قورخودور بیزی. نییه ائله باخیرسیز، سرسرینین ایچیندن فیلسوف چیخدی؟ یوخ، فیلسوف دئییلم، پسیخولوق دا. بو ساحه‌لر حاققیندا تصوروم یوخدور، بیر آز اؤز داخیلی دونیاملا باغلی ایختیصاصلاشمیش اولا بیلرم.
الینده کیچیک دفتر و قلم اولان گنج گارسون بیزه یاخینلاشدی.
— ویسکینیز وارمی؟ منه ویسکی گتیرین. سیز نه ایسته‌ییرسیز؟ — خفیفجه گولومسه‌ییب سوروشدو. منی صحبته راضی سالدیغینا گؤره ممنون و اؤزگوونلی گؤرونوردو.
Post #30536
347