پیچیلتی(حیکایه)
یازان :زومرود یاغمور
کوچورن :سحر خیاوی
باکی، ۱۸ آپرئل
ایللر اؤنجه بوردان آیریلدیغیم گون ده هاوادا بو قوخۇ واردی. آمما ساحیل دَییشمیش، گؤزللشْمیشدی. هرچند بو بورکولو و توزلو شهر‌ده ایندی اوّلکی قدر یاشیللیق یوخدو. دنیز ده اوّلکی یئرینده دئییلدی، خئیلی گئری چکیلمیشدی. حتّا اوتوردوغوم یئردن آزجا آرالیدا کیچیک بیر آدا دا گؤرونوردو. هارداسا اوخوموشدوم کی خزر گئتدیکجه داها چوخ چکیله‌جک و باکی داها لیمان شهری اولمایاجاق. «دنیزلر ده اؤلور، دئمک. خزر ده جان وئریر. بلکه ده، میلیون ایل سونرا بیر باشقاسی بوردان صحرایا، یا دا داغلارا تاماشا ائده‌جک.»
چئوریلیب آرخایا باخدیم. ماشینلارین شوتویه‌رک کئچیب گئتدییی ائنلی بولواردا ، اوستونه لامپالار وورولموش عظمتلی بینالار دا بَرق ووروردو. بورانین آداملاری دا فرقلی ایدی. مرکزدن اوزاق‌داکی دار و توزلو کوچه‌لرین، بیر-بیرینه بیتیشیک داخمالارین روحن چؤکموش ساکینلریندن فرقلی اولاراق، اونلار بو گوندن راضی، گله‌جکدن امین، راحات آدیم‌لارلا دولاشیردیلار...
قالخدیم، اللریمی جیبیمه قویوب من ده آرام‌آرام یئریمه‌یه باشلادیم. قارشیدان لنگر وورا-وورا گلن آدامی گؤروب فیکیرلشدیم کی، یقین ایچکی‌لی‌دیر، یا دا نارکوتیک مادّه‌نین تأثیری آلتیندادیر. اونونلا گؤز-گؤزه گلمه‌مک اوچون باشیمی یانا چئویردیم، اوزومو تورشودوب آدیم‌لاریمی یئیینلتدیم. خئیری اولمادی، یانیما چاتیب دایاندی:
— سرخوش دئییلم.
«یوخسا بوردا یئنی قایدالار یارانیب؟» یاد آدامین بئله راحاتلیقلا منیمله دیالوق قورماغا چالیشماسینا هیرسلندیم. چئوریلیب باخسام دا، جاواب وئرمه‌دیم.
— ... سرخوش دئییلم. نارکومان دئییلم یعنی.
چییینیمی چکیب یولوما دوام ائتمک ایسته‌دیم...
1
-منی گؤرنده دوشوندویونوز ایلک شئی بونلار اولمادیمی؟
عجب ایشه دوشموشدوم. ایللر سونرا دؤندویوم، ییرمی ساعات سونرا یئنی‌دن آیریلاجاغیم بو شهردن هئچ بیر تَزه خاطیره آپارماق نیتّیم یوخدو. گلدیییم کیمی، بوم‌بوش دا گئری دؤنمک فیکرینده‌یدیم.
دوداقلاریمی سیخیب یالاندان گولومسمه‌یه چالیشدیم. الیمی جیبیمدن چیخاریب ایره‌لی اوزاتدیم.
— یوخ، پول دا ایستمیرم، — آدام عینادلا قارشیمدان چکیلمیردی.
«لعنت شیطانا، ایشه دوشمَدیم؟» آغلیمدان کئچن بو اولسا دا، ظاهری ساکیتلیییمی قورویا بیلدیم.
قیییلمیش گؤزلرینین اطرافیندا درین قیریشلار یووا سالمیشدی، آمما چوخ دا یاشلی دئییلدی. آلنینا تؤکولموش گور ساچلاری، بیچیم‌لی دوداقلاری واردی. گؤزلرینده‌کی یورغونلوغا رغمن یاراشیقلی گؤرونوردو. اوجابوی و آریق بیری‌یدی. چنه‌سینین ساغ طرفینده درین، آمما بالاجا چاپیق گؤزه دَییردی. اَینینده‌کی اوزون پلاش(بارانی) نیمداش اولسا دا، تمیز ایدی.
— دیلنچی دئییلم، — ساکیت سسله دئدی.
— ...
— بَس نییه زَهله‌نیزی تؤکورم، ائله‌می؟ اوزونو تورشودوب اطرافا باخدی.
آغلیمدان کئچنلری دیلیمه گتیرمه‌دیم. دوزونه قالسا، آرتیق بو آداما قارشی منده بیر ماراق یارانمیشدی. تانیمادیغی بیری ایله بئله آسانلیقلا دیالوقا گیرمه‌سینین سونوندا نه اولاجاغینی بیلمک ایسته‌ییردیم. قورخو حیس ائتمیردیم، بو سولغون بنیزلی آدامین تَهلوکَه‌لی اولاجاغینی دوشونموردوم.
— آمما بیر شئی ایستیه‌جم.
«هئچ، آخیری کی...» دوشونوب الیمی جیبیمدن چیخاردیم.
— سیقارت چکمیرم، — دئدیم.
— من ده چکمیرم.
«لعنت شیطانا، بَس بو آدام نه ایسته‌ییر؟» حؤوصله‌م دارالیردی.
— منیمله صحبت ائدرسینیزمی؟ یعنی صحبت ده دئمه‌یک بونا، دینله‌مک دئیه‌ک. بیر یئرده اوتورا بیلریک... نه یئیه‌جکسه، پولونو من اؤده‌یه‌جم. نه ایسته‌سه‌نیز، سیفاریش وئره بیلرسیز. پولوم وار.
اونو دینلمه‌ییم قارشیلیغیندا منه رُوشوه کیمی تکلیف ائدیردی.
— بئله روشوه تکلیفی‌نی ایلک دفعه‌دیر ائشیدیرم، — دوشوندویومو بَرکدن سؤیله‌دیم.
— نییه بئله دئییرسیز؟ — سسینده اینجیکلیک یاراندی. — من ائله دوشونمورم. آمما ایسته‌سه‌نیز، سیز اؤز فیکری‌نیزده قالا بیلرسیز. قوی لاپ آدی رُوشوت اولسون، اونسوز دا کلمه‌لرین معنٰاسی یوخدو.
سسی یورغون و آزجا خیریلتیلی اولسا دا، نوفوذ ائدیجی ایدی. دیقّتله اوزونه باخدیم. سانکی اونو...
2
داها یاخشی گؤره بیلیم دئیه قامتینی دیکلدیب منه بیر آز دا یاخینلاشدی.
اوندان شام آغاجینین( کاج) قوخوسو گلیردی و بایاق‌دان بورنوما دولان یوسون و نفت ایییندن سونرا بو طراوتلی قوخونون منه یاخشی تأثیر ائتدییینی حیس ائتدیم. دیکلدییی اوچون ایندی داها اوجا بویلو گؤرونوردو. اوزونده قاریشیق بیر ایفاده واردی – کئچمیشین قیریشلاری، بو گونون چاره‌سیزلییی بیر-بیرینه دولاشمیشدی.
Post #30535
328