حسن بابایی (عجب‌شئرلی )
مهاجیر آذربایجانلیلارا
اوزاق بیر شهرده فهله ایشله یب
ائلین‌دن یوردوندان اوزاغا دوشوب
دیلینی تاپشیریب دینمز داشلارا
اوره‌یی اود توتوب جییری بیشیب
بیر تیکه چوره‌یین آرخاسینجا او
چوخلاری کیمی‌ده آلیشیب یانیب
عشقین باجاسیندان حیاتا باخیب
گوندوزلر چالیشیب گئجه‌نی آنیب
واختیندا " بولود" (۱) داسورگون ائدیلدی
" فرزانه"(۲) قولوندان یاپیشیب قالخدی
" شهریار" (۳) شعری‌نین درین‌لیگینه
وارارکن اؤزونو اودلارا یاخدی
فرزانه اوخودو " حیدربابا"(۴) دان
بولودون یومروغو چنه‌سینده لال
تکجه اوچ بندینی اوخورکن هله
سهندین دؤشوندن سوزولوردو بال
قارتال گوونمه‌سین زیروه اونوندور
گوزل‌لیک اوندورسا دوققوز دونوندور
دونیا یاراناندان انسان اویوندور
سهند اوخویوردو اؤزونده درحال
فرزانه بیر داها سهنده قارشی
اوزونو چئویریب ائیله‌دی سئوال
به‌یم سیز دئمزدیز حیات تهلوکه
سیز نه تئز باریشدیز بو‌اولماز بلکه
حیاتین شله‌سی آغیرلاشاندا
انسان اوزلویوندن چیخیر بیر آندا
پوزولور ایچینده بوتون سینیرلار
اضطراب هیجان دولانیر قاندا
قولاقلا.ر آسیلی بیری دانیشیر
اوبیری آسدیغی قولاغا باخیب
سهندین آغزیندان تؤکولن " در" لر
چئوره‌نی اودلایب یاندیریب یاخیب
بوایکی داهی‌نین یاشایشیندان
نه قدر یازساق بیز یئنه‌ده آزدی
هامی‌یا آیدین‌دیر " سازیمین سوزو" ن (۵)
فرزانه ایسته‌دی سهند‌ده یازدی
دوزونه قول اولساق آدام ا ؤله‌جک
بولود سمالارین باغرینی دلدی
سهندین آدینا یاراشان وولکان
ائلی‌نین دادینا ایناملا گلدی
یازدیغی اثری ویترینه قویوب
محک‌دن قورخمادی اصلا ابدا
یالان یازمامیشدی " دده قورقودو" (۶)
اوخودو یاخینا دوستا تانیشا
نئچه اون ایل‌لری گئری‌ده قویدوق
هله‌ده آرزولار چین اولمایبدیر
قدرت صاحیب‌لری آرانی قاتیب
دئیه‌سن جیب‌لری تام دولمایبدیر
یئنه تکرارلانیر تهرانا کوچمک
دوروم همن دوروم ایش همن ایش‌دیر
بیگ‌جاندان اورادا ساکین لشن‌لر
یازا حسرت‌دیرلرقیش همن قیش‌دیر
معلوم شهری‌نیزین وضعی نئجه‌دیر
صابربیر شعرینده سورموشدو نسه
نوح نئجه گورموشدو ائله اؤیله‌جه
آلدیغی جاوابی دئمز هئچ کسه (۷)
سکسن ایل سووولوب دئیشیک‌لیک یوخ
دیرچلیش اویانیش باش توتمایاجاق
ملت اؤزلویونده اوزه‌ل‌لشمسه
آیاقلارآلتینی اونوتمایاجاق
هله یاندیران یوخ کور اوجاقلاری
هله قات - قاریشیق هله دولاشیق
بوزا دوندریب‌لر ایستی قانلاری
بوش شئیی‌لراولوبدور بیزه یاراشیق
" دومان" ین (۸) ایچینده " عدالت " گزیر
ووقارین آختاریر منیم نعمتیم
عدالت دومانا سؤیله‌میشدیلر :
نعمتی ووقارین غرورو ازیر (۹)
هله شاهنامه‌دن اوخویور منه
شاهنشاه تاختینا دونن چیخمیشدی
نئچه یوز ایل‌لری آرخادا قویوب
یلزیق کوتله‌لرین ائوین ییخمیشدی
قوللوغون زامانی چوخدان اؤتوبدور
آییق اول ، دوی دوشون اینجه آنلاری
سهندی اوخویوب اؤزونو آرا
بوراخ چوخ دانیشیب شر ساتانلاری
قوی یئنه قاییداق سهند قوینونا
یام- یاشیل دؤش لری بیزی اوخویور
ساناسان شعری‌نین سطیرلرینده
بیزه دزگاه قوروب قالی توخویور
"" اورداکی دیل- آغیز سوزدن اوسانار
سوروشون مطلبی تئل‌لر سؤیله‌سین
دوداق دانیشارسا اود توتار یانار
گرکدیر زخمه‌لر ال‌لر سؤیله سین
۱- ۱- بولود‌قاراچورلو( سهند) سازیمین سوزو کیتابی‌نین شاعیری
۲- محمد‌علی فرزانه یازار.بیرده دده‌قورقوت کیتابی‌نین ایراندا ناشری
۳- محمدحسین بهجت تیریزی( استاد‌شهریار)
۴- حیدربابایا سلام استاد شهریارین تورکجه پوئماسی
۵- سازیمین سوزو ۲ جیلدده سهندین شاه‌اثری
۶- کتاب دده‌قوقودشاعیرسهندین کیتابلاری‌نین قایناغی
۷- اشاره دیر میرزه علی‌اکبر صابرهوپ هوپ نامه نین شاعیری‌نین بو‌بند شعرینه
" شهرمعلومونوزون وضع قراری نئجه دیر
نئجه گورموشدوسه نوح اویله‌جه دیر
۸- عدالت دومان ساز - سوز استادی - شاعیر
۹- ووقارنعمت شاعیر چالیشقان ادبیاتچی
https://t.me/Adabiyyatsevanlar
Post #30429
842