حیات هر زمان سن دئین کیمی، سن سئون کیمی اولمور. محاربه، حبس، ایشدن چیخاریلماق، مهاجرت... بیر-بیرینین آردینجا گلدیلر و بو کؤچورمه ایشی منیم الیازمالاریم‌لا قیرخ ایله یاخین صاندیق‌لاردا قالدی. نهایت 1403-جو ایلده بیر داها کتابخانامی نظردن کئچیرنده، یئنه بو دفترلره راست گلدیم. ایشی بیتیرمک لازیم ایدی.
بئله بیر مثل وار: «ایشی کیم گؤردو؟ او کی، قورتاردی.» ایندی، بو ایشی قورتارماق پوشگو بیریسی‌نین آدینا دوشمه‌لی ایدی. او دا، ادبیات سئونلر گروهونون چالیشقان عضوی، شاعر- یازیچی «ویدا خانیم حشمتی»نین آدینا دوشدو. ساغ اولسون‌لار؛ واخت آییریب یورولمازجاسینا منیک کؤچورولموش الیازمالاریمی تایپ ائدیب، نشره حاضرلادی. امینم کی، سایین اوخوجولار بو شیرین حکایه‌لری اوخویاندا ویدا خانیمین امه‌یینه منتدار اولا‌جاق‌لار.
سؤزومون سونوندا آرتیرما‌لییام: تأسفلر اولسون کی، کؤچورولموش کتاب‌لار زمان کئچیدیندن اماندا قالماییب، آرا‌دان گئدیب‌لر. اونا گؤره ده الیمیزده بو کتاب‌لار حاقیندا اطرافلی معلومات چوخ آزدیر. بو اومیدله کی کتابین سونراکی چاپ‌لارینا کیمی، اویرژینال نسخه‌لر حاقیندا لازمی معلوماتی الده ائده بیلیم.
اردیبهشت 1404
https://t.me/Adabiyyatsevanlar
Post #30420
531