کیان خیاو

اللريم گؤروشه کؤرپو سالاندا
تؤکولمه يه جکدي ، آمما تؤکولدو
عؤمرومه – گونومه يابانجي گؤزلر
ديکيلمه يه جکدي ، آمما ديکيلدي

چنبره دوشموشم ، چنبره ، آمان  !
ساغيمدا ايلان وار، سولومدا چايان
دوداغيم دونياني چاغيران زامان
تيکيلمه يه جکدي ، آمما تيکيلدي

بو يوردون باشينا گؤر گلميش نه لر ؟!
نه جئيران آغلايار،نه جويور ملر
پاسلي پنجره مه پاخير پرده لر
چکيلمه يه جکدي ، آمما چکيلدي

هاني آللي – گوللو سونا گؤزللر ؟
باشيما ساورولور ساري خزللر،
سينه مين سازيندان قوشما – غزللر
سؤکولمه يه جکدي ، آمما سؤکولدو

سازاق هاردان اسير بيزيم باغچايا ؟
باغچادان بورولوب دوشور تاغچايا
آه ، تََزه دردلريم کؤهنه بوغچايا
بوکولمه يه جکدي ، آمما بوکولدو

آي ائللر، آياغا دورورام ، نه غم ؟
بوردا درد اکيرم ، عيصيان بيچيرم
چونکو تورپاغيمدا قارا بير ستم
اَکيلمه يه جکدي ، آمما اَکيلدي


https://t.me/Adabiyyatsevanlar