زررین رزندی(طنناز)

گوندوز-گئجه یادیمداسان یادیمدا
هرنفس ده،هر آتدیغیم آددیمدا
آجیم سن-سن،بالیم،آغیز دادیمدا
سن سیز منیم روز قیامتیمدیر
سنی سایاخلاماق عبادتیمدیر.

سن سیز گوُز یاشلاریم سوزور یاناقدان
یوخلوقون کوُنلومو سالیب آیاقدان
بیرعمردور درد چکیرم فراقدان
سنی سئومک،بوُیوک جسارتیمدیر
سنی سایاخلاماق عبادتیمدیر.

گئدیشین یقین دیر،دوُنوشون گومان
هئچ دئمه دین،واردیر عطریندن اومان؟
مندن سونرا آلار دنیاسین دومان؟
عشقین منیم،یازیم طراوتیمدیر
سنی سایاخلاماق،عبادتیمدیر.

شیرین یوخولاردا گزیرم سنی
باسیرسان باغریوا،توکنمیش تنی
آلیرسان الیمدن من ده کی منی
هر گئجه سن سیز لیک،غرامتیمدیر
سنی سایاخلاماق،عبادتیمدیر.

سرخوشونام گتیر منی اوُزومه
سو سپ گیلن آلوووما-کوُزومه
سوُیله احسنت،من ده اولان دوُزومه
عشقین ایلکیم-سونوم،نهایتیمدیر
سنی سایاخلاماق،عبادتیمدیر.

عزراییل قصد ائدیب بیر گون دریللم
کهنه جئجیم کیمی،گورا سریللم
گلسن قبریم اوسته،اینان دیریللم
سنه لاییق وارلیق،محبتیمدیر
سنی سایاخلاماق،عبادتیمدیر.


https://t.me/Adabiyyatsevanlar