علی جوادپور
هر شئی خبردی!…
هر شئی خبردی،
هر شئی خبر قده‌ردی
یالاواجلیق‌دان، باش گؤتوروب
گمی‌لره تپیلن مهاجرلر هر گون قیریلماق‌دادیر.
– بیر خبر دی.
هاوانین سویوقلوغو نئچه گون داوام ائده‌جک.
– بیر خبردی.
سحردن-آخشاما دونیادا انقلاب اولور.
– بیر خبردی.
دیکتاتورلار همه‌شه دیک‌ده اوتورارلار
و دیشت (دینج) اوتورمازلار.
– بیر خبردی.
نوبئل آدینا وئریلن موکافات‌لارین کؤکو
گئدیب باکی‌نین نئفت قویولارینا دایانیر.
– بیر خبردی.
اورتادوغو بیر آغ گویرچینین اوخودوغو آغی‌دیر
اورتادوغو قان‌اوجاغی، قان چاناغی‌‌دیر
– بیر خبردی
اولایان یالقوزاق‌دیر،
اوخویان بایقوش‌دور عرب چؤل‌لری.
– بیر خبردی
چوخدان‌دیر سندن خبریم یوخدو،
نئجه‌سن دوستوم؟
– بیر خبردی.
آفریقا، آجلیق‌دان قاچا بیلر آمما «قاراواجلیق”»دان قاچا بیلمه‌یه‌جک
– بیر خبردی نه واختسا ائشیتمیشم.
اوسته‌کی او «قاراواجلیق» سؤزونو اؤزوم دوزلتمیشم.
یالاواج سؤزونه بورجلویام بو تاپینتینی،
تقدیم ائدیرم آغ‌دری‌لی‌لره
– بیر خبردی!
خبرلرین گؤزودور یاشاماق،
ببه‌یینه گولله‌لر خوروزلانیر.
یاشاماق خبر باشلیغی‌دیر،
آیاق آلتیندا سورونور.
بیر خبردی:
«حلب»ین سویولان دریسی
«قاراباغ»ین اوخونان شیکسته‌سی.
اورمو گؤلو بیر دوزلو خبر ایدی،
یئل‌لر آپاردی اوزاق‌لارا
گتیردی یاخین‌لارا!
«ایقناسیو» ماتادور خبریدی «لورکا»دان.
«گونش بیر گون سویویاجاق» کؤهنه بیر خبرایدی «ناظیم»دن.
کندیمیزده «قاراغانلی دوز» آدیندا-
ماوی چالمالی، ایپک یایلیق‌لی
یووشان قوخولو بیر اوت‌لاق وار؛
یاز گلنده اونون اوستونده اوزانار یاشیل‌لانار
ایندی لودئرلر جیگرینی سؤکور،
شرکت‌لره قوم داشیماق اوچون.
– بیر خبردی.
«اینجیرلی‌بولاغی»نین اوستونده بیر بنؤوشه‌یه داریخدیم
و بورنومون اوجو گؤینه‌دی بو اوزو یازا دوغرو گئدن گون‌لرده.
سن دئین بیر خبر دئییل،
آمما خبردی!
آرتیق خبره دؤنموشوک
نه وار، نه یوخ ، نه خبر…؟
خبرایک، خبره یاشیییریق!..
خبر م
خبر دی
خبر سن،
هرنه، هر شئی خبردی، خبرین یوخدو!
خبر وار داها هئچ نه یوخ!…
https://t.me/Adabiyyatsevanlar
Post #30311
288