دونیا ناناش- ناش اولاجاق
خیرالله حق‌بیگی (ساپلاق)


اشی دور بورجودالیم دونیا ناناش- ناش اولاجاق!
«عمو سام» هر نه دئییر هامیسی بیر باش اولاجاق!

دونیادا حاکیم اولور تازه نیظام، تازه اویون،
«جاز» هاواسی‌لا «بیریک» اوینایاجاق قوردلا، قویون،
هله بوندان سورادیر چال‌ ها چالین، سوی‌ ها سویون؛
وارلی‌لار یوخسول ایله لاپ بئله قارداش اولاجاق،
اشی‌ دور بورجودالیم دونیا ناناش- ناش اولاجاق!

تازه بیر نظمه دوشور گردش دؤوران آ کیشی!
آچیلیر پوللولارا بیر یئنی مئیدان آ کیشی!
یوخسولا بخش اولونور درد و غم ارزان آ کیشی!
بو اویوندا نئجه گؤر پیرتداشا - پیرتداش اولاجاق،
اشی‌ دور بورجودالیم دونیا ناناش- ناش اولاجاق!

بئله بیر نظم‌ده یوخدور داها شئیطانین الی،
ائله تنظیم اولونور سرمایادارلیق تملی،
«آغ سارای»‌دان نه یئره بیر بالا پورسوق دئیه‌لی
هر دوواردان یوخاری دیرماشا- دیرماش اولاجاق،
اشی‌ دور بورجودالیم دونیا ناناش- ناش اولاجاق!

گر چی هر یئرده حقیقت سئون اینسان تالانیر،
امن- آمانلیق یئرینه قان بئشییی ییرقالانیر،
هاردا زحمت چکن اینسان گوروسن آج دولانیر؛
وارلی‌نین قیسمتی بو اورتادا داش- قاش اولاجاق،
اشی‌ دور بورجودالیم دونیا ناناش- ناش اولاجاق!

«قاراباغ» عیبی نه‌دیر «وارطان»ا پیشکئش چکیلیر،
یئنی نظمین بالاجا توخمودور اوردا اکیلیر،
اینجیمه عیب ائله‌مز باش کسیلیر، قان تؤکولور؛
«آغ سارای»دان هله چوخ یئرلره گؤز- قاش اولاجاق،
اشی‌ دور بورجودالیم دونیا ناناش- ناش اولاجاق!

«بوسنی»ده سو یئرینه قان ایچیلیر علتی وار،
نه اوچون اونلارین آزاد یاشاماق نیتی وار؟!
درده باخ «بوسنی»لرین حاققا ساری رغبتی وار،
حاق سئوه‌ن کیمسه‌لرین بهره‌سی قان یاش اولاجاق،
اشی‌ دور بورجودالیم دونیا ناناش- ناش اولاجاق!
1372 - کرج


ایضاح:

خیرالله حق بیگی(ساپلاق) ۱۳۲۰نجی گونش ایلینده آذربایجانین هریس ماحالیندا اکینچی بیر عائله‌ده دونیا گؤز آچمیشدیر. بیر چوخ آذربایجانلی عائله‌لر کیمی هله یئنی‌یئتمه یاشلاریندان عائله‌سی‌ایله بیرلیکده تهرانا کؤچمک مجبوریتینده قالیر. بو شهرده دیپلم آلیر و ارتش‌ده استخدام اولور. آنجاق بیر مدتدن سونرا بو ایشدن آزاد ائدیلیر.
ساپلاق بیر خالق سئور و آزادلیق اوغروندا دؤیوشن آذربایجان شاعری کیمی انقلابادک چوخلی ساتیریک شعرلر مولفی‌ اولور. اونون شعرلرینین اکثریتینی فاناتیزم علیهینه اولان اثرلر تشکیل ائدیر. انقلابدان سونرا “هریس‌دن بیر سس” (۱۳۵۸) و “من گونش وورغونویام” (۱۳۶۹) آدلی غیر ساتیریک اثرلری چاپ اولور. آنجاق اونون صنعتکار کیملیگی اولان ساتیریک اثرلری‌نین اکثریتی هئچ وقت ایشیق اوزو گؤرمور. ساپلاق انقلابدان سونرا کرج شهرینده بیر سیرا دوستلارینین اشتراکیلا “فرخی یزدی” آدینا ادبی انجمنین قوروجولاریندان اولور و ایللر بویو بو ادبی انجمنین اداره هیاتینده چالیشیر. آذربایجانیمیزین بو شاعیر اوغلو ۱۳۸۸نجی ایلین خرداد آیی‌نین ۸-جی گونو یاشادیغی کرج شهرینده حیاتلا ابدیلیک وداعلاشیر.

قایناق:ایشیق سایتی
https://t.me/Adabiyyatsevanlar