🖊: غلامرضا مجدفر
کئچدی باهار- ی عؤمروموز
ایت کوره‌دن کئچن کیمین
گئن کوره‌دن هاساند اولار
دار کوره‌دن کئچن کیمین
بئل بوکولوب، قوُلاق باتیب
گؤز ده دوشوبدو چوُققورا
کوند اوراغیله خسته‌جان
گونده بیچین، بیچن کیمین
دیشی دوشن قاری- قوجا
انگی‌ده توُتمورو غذا
سن‌کی حالین بیلنمه‌سن
دیشلی یئییب، ایچن کیمین
ایپ قیریلیب، نه‌جان چیخیر
جان ییغیشیب بوغازینا
داس- ی اجل ده کسمیری
دوغرور دویون آچان کیمین
بال و پرین یولوب فلک
یوخدو توان- ی پروازی
نه دوشورو دوشن کیمی
نه اوُچورو اوُچان کیمین
بیر بئله دردلی کیمسه‌نین
دردینی هاممی آنلاماز
دار دیبینه دوشن بیلر
بندی آچیب، قاچان کیمین
جوخه تیره باغلانان
یاخشی قانار تیرین دادین
قلبینه گوللـه‌لر دییب
قیرمیزی گول ساچان کیمین
جامده زهر شوکران
راه نجات باغلانیب
واخت قوُتاریب، چاتیب زامان
مجبور اولوب ایچن کیمین
یوک- یاپی باغلا کاروان
ایندیجه سسلنر جرس
یئیلاقی ترک ائدیب
کؤچک، ائل اوبادان کؤچن کیمین
ای کی بوُ نازلی دونیادا
نعمت ایچینده اوینوسان
سئچمه‌یه مایل اولما چوخ
سئچمه‌لینی سئچن کیمی
https://t.me/Adabiyyatsevanlar
Post #30267
591