توتقون
دنیادا

گنجلیییمده اؤز- اؤزومه دئیردیم،
من اؤلرسم، گؤزوم قالار دنیادا
سؤز توخویوب، شعیر چلنگی هؤردوم،
دئدیم هله سؤزوم قالار دنیادا

دؤرد عنصردن خمیرله شیب، یوغرولدوم،
عاشق اولدوم، عشق اودوندا قوورولدوم
کوله دؤنوب، آسمانه سوورولدوم،
دئدیم نئیله ک، توزوم قالار دنیادا

آنجاق منی آیاقلارا سالدیلار،
گاهدان ساتیب، قول کیمی، گاه آلدیلار
چوخلار منیم چینیمدن اوجالدیلار،
دؤزوب، دئدیم دؤزوم قالار دنیادا!!

داغلار منه، من، داغلارا چکیلدیم،
داغلاشینجا اوره کلره اکیلدیم
ارییب هئی، چراغلارا تؤکولدوم
یاندیم، دئدیم، کؤزوم قالار دنیادا

گؤی اسگییه توتولدو آغ گونلریم،
هئچ بیر یئره چاتمادی سس اونلریم،
جاغلانینجا طرفلریم، یؤنلریم،
ساندیم توتقون گیزیم قالار دنیادا

https://t.me/Adabiyyatsevanlar