کریم قربانزاده
کشگه بو مثلی بئله دئییه‌ایدیلر، «هرزادین تزه‌سی، دوستون، کوچه‌لرین، خاطیره‌لرین،حتتایئلین ده کؤهنه‌سی...».
اوزون ایللردن سونرا دوغولدوغوم شهرده، دوغولدوغوم کوچه‌یه، عباسی خیاوانینین آخرینده، سیاواندا- وزیر آباد دربندینه گئتدیم، کوچه‌نین آدینی عوض ائله‌میشدیلر. دربنده گیرن یئرده بیر ده کوچه‌نین اورتاسینداکی قیرخ پیله چشمه‌لری دولدورموشدولار. بعضن کوهنه ائولری، سؤکوب یئرینه تزه دام-داش تیکمیشدیلر. حاج علی‌نین یئکه حیطینی آپارتمان ائله‌میشدیلر، قانا فاطماسی‌نین باغیندا اوچ -دؤرد آغاج گؤروکوردو.
دربندی اوچ-دؤرد دفه آشاغا یوخارییا گئتدیم، قایتدیم. جئیران صادیغین حیطینه یئتیشنده آیاقلاریم سوستالدی، کشکه او قاپی آچیق اولایدی بیر ده او پیلله‌لردن او حیطه باخایدیم. چوخ اویان- بویانا باخدیم، علی خان کوچه‌ده دئییلدی، پوتا رسول کیمسه ایله ساواشمیردی، تخته بؤیوک آغا گیلین ائولری خارابا قالمیشدی،
محله‌میزین لوتوسو ایوب پتی، تریلی تصادوفونده عومرونو سیزه وئرمیشدی. آجی زیر زیبیل ایله دولو ایدی، کوهنه قبریستانی پارک ائلمیشدیلر. ساری داغ، ولیعصری کورکلرینده داشیماقدان زیق- زیقا دوشموشدو. کوچه‌دن باشقا، بو بویا-باشا چاتدیغیم یئرده، کیمسه منی تانیمیردی. خاطیره‌لر بیر به بیر گؤزومون اؤنونده صف چکیردیلر، منسه حیرتلره دالیردیم. بیردن بیره قدیمی بیر تانیشا راست گلدیم. کوچه‌ده سرین بیرمئح اسدی، دوز او شاقلیق گونلری کیمی جانیما دولدو...
کشگه بو مثلی بئله دئییه ایدیلر «هر زادین تزه‌سی، دوستون کوچه‌لرین، خاطیره‌لرین، حتتا یئلین ده کؤهنه‌سی...».
https://t.me/Adabiyyatsevanlar
Post #30238
524