کیچیک بیر آنتراکت و پذیرایی‌نین آردیندان ویداخانیم حشمتی زکیه‌خانیمین تورکیه تورکجه‌سیندن کؤچوروب اویغونلاشدیردیغی "گؤزل یازیلار-مکتوبلار" کتابی‌نین ناشری جناب میثم مهدی‌پورو دانیشیق اوچون صحنه‌یه دعوت ائتدی.
جناب مهدی‌پور خانم ذوالفقاری ایله فیسبوکدا تانیشمالاری‌نا و اونون آردیندان نادره کتابی‌نین صفحه‌بندی سی اوزرینده ایشله‌دیگینه اشاره ائدرک "بیتیک‌چی" انتشاراتینی آچیدیقدان سونرا "گؤزل‌یازیلار مکتوبلار" کتابی‌نین نشری حاقدا ایضاحلار وئردی. اونون دئدیگینه گؤره بو کتاب ایکی خصوصیته مالک‌دیر بیرینجی‌سی کتابین فونتو کی تورکجه یازیلارا اویغون اولان "ماهور" فونتودور و جناب مهدی‌پورون سفارشی اوزره یازیلمیشدیر و ایکینجی‌سی ایسه صفحه‌باغلانیشی‌نین دوزگون و استاندارد اولماسی‌دیر. او سؤزلری‌نین سونوندا هرکسی سالن‌دا‌کی سرگیلنمیش بو کتابی آلیب و عمومیتله کتاب اوخوماق و تورک ناشرلردن حمایت ائتمگه دعوت ائتدی.
۴
مراسمین بو بؤلومونده سس صنعتچی‌سی کبری خانیم میرحسینی خانم ذوالفقاری‌نین حکایه‌لریندن بیرینی سسلندیرمک اوچون صحنه‌یه چیخدی. آدی " آنام هشترخان" اولان بو فولکویازی کبری‌خانیمین گؤزل ایفاسی ایله مجلسه خوش احوال روحیه باغیشلاییب دوداخلارا گولوش گتیردی.
سؤز موسیقی‌یه گلیب چاتمیشدی، ساز و سؤز استادی عاشق حسن اسکندری صحنه‌یه دعوت اولوندو.
عاشق‌حسن سازی‌ایله بیرگه صحنه‌یه چیخیب خانم ذوالفقارینی تبریک ائدیب بیر سیرا شیرین صحبتلرین آردیندان سازینی دیللندیریب گؤزل ماهنیسی ایله موسیقی‌یه بزک وئردی. او خاطره‌خانیم خانلونون مدحینده بیر ایکی جمله سؤیله‌یرک اوندان‌دا بیر ایفا گؤزله‌دیگینی بیلدیردی. قوجا عاشیق بویوک آلقیش‌لارلا صحنه‌نی ترک ائدیب یئرینی استعدادلی بداهه‌چی و دیکلماتور سمیرا تقی‌زاده یه وئردی.
سمیرا خانیم، خانم ذوالفقارینی تبریک ائتدیکدن سونرا اوندان حیات یولداشی، ائولادلاری و نوه‌لری‌نین آدلارینی سؤروشوب بو آدلاری ایچرن فارسجا بیر بداهه سویله‌دی. آردیندان سوسن‌خانیم نواده‌رضی‌دن یاد ائده‌رک اونون "شلاله‌لر شله‌سی" کتابیندان گؤزل و حزین بیر شعر دیکلمه ائتدی. برنامه‌نین سونونا خاطره‌خانیم خانلونون سازی و سؤزو بزک وئردی. سون سؤز ایسه زکیه خانیم ذوالفقاری یه وئریلدی او بؤیوک تواضع ایله برنامه‌نی دوزنله‌ین هرکس‌دن تشکر ائده‌رک ائل‌بیلیمی موسسه‌سیندن، الینه قلم آلدیغی یئر، و سوسن خانیمدان ایسه، اونو یازماغا ترغیب ائدن شخص اولاراق یاد ائتدی. او ادبیات سئورلر کانالی و اونون اعضاسیندان اولان جناب قربانزاده‌نین یئرینی بوشلاییب او کانال طریقی ایله تانیشدیغی بویوک انسانلاردان تقدیر ائتدی.سونرا "یوردومون سیرلری" آدلی ترجمه اثرینی نشر ائدن جناب آیهان میانالی‌یه، بو اثری سسلندیرنلر جناب جابر پورباقر و حمیده‌خانیم رنجبره و یازیلارینی نقد ائدن جناب ترکانا منت دویدوغونو بیلدیریب، تانری‌دان ائل ائوی‌نین قوروجوسو جناب صرافی‌یه جان‌ساغلیقی و اوزون عؤمور آرزولادی و حیات یولداشی جناب نصیرپوردان دوداخلارا گولوش گتیرن بیر طنز‌ایله تشکر ائدیب سؤزلرینه سون وئردی.
بو سؤزلرین آردیندان قادین اثرلری کتاب ائوی طرفیندن زکیه خانیما بیر تقدیرنامه سونولدو. ائل‌بیلیمی، ائوده‌آل و قادین اثرلری کتابخاناسی‌نین باشچیلاری اولاراق جنابلار مهندس صرافی، نوید محمدی و خانم‌فرانک فریددن، آیریجا، مراسمین مدیریتی‌نی عهده‌دار اولان خانملار پرنیان ساعی و مناف‌زاده و سمعی‌بصری بؤلومونون مدیری جناب بلالی و بوتون اوزاقدان یاخیندان گلن قوناقلاردان تشکر ائدیلیب خاطره شکیللری چکیلدیکدن سونرا مراسمه سون وئریلدی.
https://t.me/Adabiyyatsevanlar
Post #30191
389