صالح سجادی
شَهَردن قیراقدا بیر اتوبانین او باش بو باشی دیر یاشاییش منه
هر گون بیر قیلیقدا دوشورم یولا من یولا یابانجی یول تانیش منه
بیر باشی ایش یئریم بیر باشی ائویم یوخولو گئدیرم یوروقون دؤنورم
گئدن باش قارانلیق گلن باش ظلمت هرگون قورتولوش دور باشلانیش منه
بیر قراردا گئدن ایستی مینی بوس... موتورون اویدوران تیریلتی سَسی…
صندل ده اوزومو قوجاقلاییرام... آنا بطنی دیر بو بیر قاریش منه
بو مینی‌بوس منی هر سحر دوغوب، هر آخشام نعشیمی گؤمور اؤزونده
هر سحر اؤزوندن منی آییریب، هر آخشام دئییر کی گل قاریش منه!
او باش بو باشیندا بو اوتوبانین ایکی مگنت دوروب، ائویم، ایش یئریم
او دئییر ای تنکه داها قوپ مندن بو دئییر ای دمیر گل یاپیش منه
من دمیر دئییلم آما ایللردیر مغناطیس تونل‌ده ایکی مگنته
اؤزومو قوپاریب یاپیشدیریرام قالسین کی آغاجلار دئییر قوش منه
آغاجلار...هه، منی قوش بیلیر آمما، منیم قانادلاریم چوخدان اریییب
ایکاروس چوخداندیر دوشوب دنیزه داها قورتولوبدور بو یاریش منه
بعضا آی‌دان ایلدن شهره گئدنده آداملار گؤزومه ائیبه‌جر گلیر
خیاوانلار، ائولر، توکان‌بازارلار...اؤزونو گؤسترمیر بیر تانیش منه
آنسیزین بیر پورتال آیاغیم آلتدا، آچیلیب دوشموشم بورایا سانکی
اؤزومدن سورورام: سن هارالیسان؟ ندن بیتمه‌ییر بو آختاریش منه
اتوبان بیر دئودیر باشی بیزیم ائو، ایاقلاری ایسه منیم ایش یئریم
او دئوین عؤمرونون شوشه‌سی منم، دوشوم‌ده بیر پری دئییر دوش! منه
ماشین‌لاری تک-تک باخیب آختاریب منی تاپمایینجا دلی اولور دئو
چارپیر ماشین‌لاری بیربیرلرینه... بیر گون ساتاشاجاق او باخیش منه
او آن بیر ایکاروس یانمیش قانادلا، اوچاجاق مینی‌بوس پنجره‌سیندن...
شهَردن قیراقدا بو اتوبان دا... نه دئمک ایسته‌ییر بو یاغیش منه؟
https://t.me/Adabiyyatsevanlar
Post #31028
159