۲
جناب صرافی‌نین مجلسه دگرلی سؤزلری‌ایله آچیلیش گئتیرمه‌سیدن سونرا خانم فرانک فرید ایلک دانیشان اولاراق صحنه‌یه چیخدی. او قادین اثرلری کتاب ائوی‌نین قوروجوسو اولاراق، بو درنک و اونون چالیشمالاری حاقدا ایضاحلار وئریب خانم پرنیان‌دان بو برنامه‌نی ارگانیزه ائتدیگی اوچون تشکر ائتدی. او سونرا زکیه خانیمین داستان کارگاهی حاقدا یازدیغی مطلبی اوخودو. زکیه خانیم بو یازیدا بو کارگاها قاتیلان هرکسین خصوصیتلرینی شیرین بیر دیل ایله بیان ائتمیشدی. خانم فرید "یاز" درگیسی‌نی مجلسده‌کی‌لره سوناراق سؤزلرینه سون وئردی.
آردیندان رقیه‌خانیم کبیری دانیشیق اوچون صحنه‌یه چاغیریلدی او مراسمین قوروجولاریندان تشکر ائده‌رک سؤزه باشلادی. او آتاارکیل جامعه‌لرده‌کی خانیم‌لارا یارانان محدودیتلره اشاره ائده‌رک دئدی محدودیتلر سرحد یارادیر و بو سرحدلردن آشماق ایسه انسانلارین حیاتلاریندا دؤنوم نکته‌سی اولوشدورور. او خانم ذولفقاری‌نی جسارتلی بیر خانیم‌کیمی تانیدیغینی سؤیله‌دی. او زکیه خانیم کیمی اورتایاشلاریندا باشاریلار الده ائدن خانیملاری پاییزدا چیچکلنن آغاجلارا بنزتدی. خانم کبیری سؤزلرینین آردیندا فرانسه‌‌ده کوک‌له‌نیب روس و باشقا ادبیاتلارا داخل اولان فولیتون(Feuilleton) ژانریندان دانیشیب. خانم ذوالفقاری نین "سون قرار" آدلی کتابینی معرفی ائده‌رک کتابداکی بیر نئچه قیسا حکایه‌نی تنقید ائتدی. اونون دئدیگینه گؤره زکیه خانیمین حکایه‌لری خاطره و همین بو ژانرین آراسیندا بیر یازیلاردی کی اخلاقی اجتماعی مضمونلار داشییر. خانم کبیری سؤزلرینین سونوندا زکیه‌خانیما داها آرتیق باشاریلار دیله‌ییب یازارلارین کتابلارینین داها آرتیق ویتیرینلره گؤرونمه‌سینی آرزو ائتدی. او سونرا ادبیاتدا انسانسال یارادیجیلیغین اؤنمینی وورغولایاراق یاپای ذکا یا (هوش مصنوعی) دن استفاده ائدنلری صادق اولوب، اؤزلرینه و ادبیاتا سایغی دویماق آدینا بو ایشلرینی آلت‌یازی دا اعلان ائتمه‌لرینی ایسته‌دی.
ائل‌بیلیمی درگیسی‌نین سردبیری و بو درنگین قدیم اویه‌لریندن اولان جناب فرهمندی نوبتی دانیشان اولاراق صحنه‌یه چیخدی. او فولکلور ساحه‌سینده چیخان درگی‌نین سایی و محتوالاریندان آمارلار وئریب خانیملاردان فولکلور بیلگی‌لرینی بو درنک‌له پایلاشمالارینی ایسته‌دی. او سونرا زکیه‌خانیم ذوالفقارینین مختصر بیوگرافیسی‌نی بیان ائدیب، اونون بو درنکده‌کی گؤردوگو ایشلردن و درگی‌ده چاپ اولونموش یازیلاریندان معلومات وئردی. اونون دئدیگینه گؤره ۹۲ اینجی ایلدن بری زکیه خانم ذوالفقارینین ۱۲ جلد ائل‌بیلیمی درگیسینده اوست اوسته ۵۰ صفحه یازیسی چاپ اولونوب آیریجا ۱۳۹۶ اینجی ایلده همین درگی‌ده سوسن خانیم نواده‌رضی‌نین باشچلیغی ایله اونون اوچون اؤزل صفحه‌لر آیریلیب. او سونرا زکیه خانیمین یازیلاری‌نین ایچریکلیکلری حاقدا معلومات وئره‌رک آرتیردی بو یازیلاردا عموما"آجی بیر طنز گؤرونور و چوخونلوقلا قادینلارین تاپدالانمیش حاقلارینا توخونولوب.
۳
سؤز بورا چاتدیقدا آپاریجی ویدا‌خانیم حشمتی زکیه‌خانیم ذوالفقاری حاقدا بیر نئچه جمله بیان ائدیب سؤزو جناب موسی‌زاده یه وئردی. جناب موسی‌زاده "صباحی" حکایه درنگی آدینا سؤزه باشلایاراق مجلسین قوروجولاری خصوصا جناب مهندس صرافی و جناب نوید محمدی‌دن تشکر ائتدی. سونرا خانم ذوالفقارینین مرند شهرینده "باغچه‌بان" آدلی هفته‌لیک درگیده‌کی یازیلاریندان و سونرالار شعر انجمن‌لرینده و "صباحی" درنگینده‌کی چالشمالاریندان دانیشیب او ایللرده آغیر خسته‌لیگینه رغمن درنک‌ده کی حضوروندان و جوانلاری تشویق ائتمه‌سیندن تقدیر ائتدی.
سؤز نگارخانیم خیاوی‌یه وئریلدی. او برنامه‌نین قوروجولاریندان تشکر ائدیب بیر یازار خانیمین آغیرلانماسینا سئوینیب فخر ائتدیگینی سؤیله‌دی. سونرا دده قورقوددان باشلاییب مختلف دؤورلرده قادینلارین نقشلرینی تورک ادبیاتیندا بیان ائده‌رک دئدی بو اؤلکه‌ده کی محدودیتلر قادینلارین ادبیات ساحه‌سینده داها گلیشمیش نقش ایفا ائتمه‌لرینه مانع اولوبدور آنجاق او دؤنمده‌کی بعضی چالیشمالاریدا اونودماق اولماز، اونون دئدیگینه گؤره ۵۷ انقلابیندان سونرا ادبیات ساحه‌سینده خانیملارین چالیشمالاری داها دا چوخالیر و "حمیده رئیس‌زاده" نین ماوی‌لری او دؤنمین اؤرنک اثرلریندن ساییلیر.
نگارخانیم سوزلرینین آردیندا ائل‌بیلیمی درنگینده‌کی چالیشمالاریندان دانیشیب بو درنگین قادین‌قولونون نئجه تشکیل اولماسینی ایضاح ائتدی و آردیندان خانم ذولفقاری‌نین بو درنک‌له ایش‌بیرلیگه داخل اولماسیندان سؤز آچاراق طنز ایله یوغرولموش صحبتینه سون وئردی.
Post #30190
356