✍️: ائلمان موغانلی

دیجیتال ساعات‌لارین بلیرسیزلیگی ایله
هله ده پارلاماغی اونوتمایان کؤهنه اولدوزلارین کسین‌لیگی آراسیندا
سنین بال گؤزلرینی دوشونورم
سون باهارین بالا دؤندوگو
ایکی دینج اؤلکه‌
و ایشیغین یئر اۆزۆنه چاتمادان اؤنجه
نئچه آنلیق دینجلدیگی یئر.

خورما بویالی ساچ‌لارین
یئر کوره‌سینه گون‌باتانی آخیدان
چاغلار بیر چای
سانکی گونش یئری اونوتماسین دئیه
ایشیغیندان نئچه تئل
چیگین‌لرینده امانت بوراخمیش.

گولوشون
یاغیش سونراسی ایلک ایشیق
گؤیون‌ یئره باغیشلادیغی گؤزللیک.

گؤزلرین گولرکن
بولودلارین گؤز یاش‌لاریندان
گؤل‌لر دولور
دورنالار قاییدیر
تانری سئوینیر
و بشریتین گوناه‌لاری باغیشلانیر.


سن
ایلک باهارلا سون باهارین
اورتاق اولدوق‌لاری بیر باغچا
چیچک‌لر عطیر ساچماغی
و یاپراق‌لار اوچماغی
سندن اؤیره‌نیرلر،
سانکی
گرچک ایله رؤیا آراسی
سینیر اولمادیغینی قانیتلاماغا یارانیبسان،
و‌ من
آلگوریتمالار‌لا سویوق حئساب‌لارین عصرینده بئله
معجزه‌لره اینانان بیری
ندنکی سنی گؤرموشم.

https://t.me/Adabiyyatsevanlar