کریم گول اندام

• انسان
•
• کائیناتدان مایالانمیش جوشقون طبیعتیم وار
• دوغا کیمی عوصیانکارام تانیلماز قودرتیم وار
•
ماغارادان باش قالدیریب ،کهکشانا وارمیشام
ایمپریالار چوروتموشم اولدوزلاری یارمیشام
هر ایقلیمه یول سالمیشام  ،اؤزگورلوک آختارمیشام
هئچ بیر مخلوقا بنزه مز غریبه طینتیم وار

تاریخ بویو نئجه -نئجه آللاهلار یاراتمیشام
نئچه -نئچه مدنیت اوجاغی قاراتمیشلام
دوشمانیمین گؤزلرینین کؤکونو ساراتمیشام
هم جسارت ،هم عداوت ، هم ده عدالتیم وار

قان تؤکمکده ان ییرتیجی حیوانلارین شاهی یام!
یئر اوزونون مخلوقاتی ایچینده ان داهی یام !
من محبت ایلاهه سی، سئوگینین آللاهی یام!
پیس ،یاخشیدان نه آد قویسان اونا شباهتیم وار!

مین کیشینی بیر کیشییه دینمز قوربان وئرمیشم!
یئراوزونده،دنیزلرده ،گؤیده فرمان وئرمیشم !
بیر جانلی نی قوروماغا،مین جور درمان وئرمیشم!
تایسیز نیفرت ،سایسیز قودرت ،سونسوز محبتیم وار

من یوخ اولسام بو سونسوزلوق هئچ بیر ایشه یاراماز
یئرین ،گؤیون  احوالینی هئچ بیر جانلی آراماز
اؤلگون بیر حیات یاشانار ،آیاق اوسته دوراماز
بوحیاتی دیرچلتمه یه سونسوز مهارتیم وار حآ

من اولماسام کیم گزه جک انگینلیگین بحرینی؟
کیم چکه جک طبیعتده جانلیلارین قهرینی؟
کیم ووراجاق یئر اوزونده مدنیت موهرونو؟
من بیر  اوریمسل انسانام بونا  لیاقتیم وار !

خرداد -۱۴۰۵-اورمو

https://t.me/Adabiyyatsevanlar