خبر
«همت شهبازی»نین یئنی تنقیدی اثری ایشیق اوزو گؤردو
تانینمیش ادبیاتشناس و ادبیات تنقیدچیسی «همت شهبازی»نین «شعرین ذروه‌سی (آذربایجان چاغداش شعریندن تحلیل‌لر)» باشلیقلی یئنی تنقیدی اثری ایشیق اوزو گؤردو.
بو اثر، «آراشدیرما، تنقید و یوزوم» ترکیبلی بیر آراشدیرمادیر. مؤلف اثرین «گیریش» بؤلومونده یازیر:
«قارشینیزدا اولان بو یازیلار، قارشیسینا قویدوغو متنی یوزوم دایره‌سینه گتیره‌رک اوخوجو یوزومو ساییلیر. بو اوخوجونو ایستر پئشه‌کار تنقیدچی، ایستر عادی بیر اوخوجو نظره آلماق اولار… بو یوزوملارین مقصدی عملی (پراکتیک) تنقیدچیلییمیزه دوغرو آتیلان ایلکین آددیملاردیر… یوزوملار عمومی‌لیکده دیوان شعرینین چاغداش دؤورده داوامچیلارینی احاطه ائدیر. بونلاری شرح ائدرکن، دیوان شعری ایله فرقلرینی ده ایشیقلاندیرمیشیق. دئمک اولار بورادا شرح اوچون سئچیلن شعرلر «آذربایجان شعرینده مدرنیزم» (۱۳۹۹) کتابیمدا وورغولادیغیم «چاغداشلانما» دؤورونه عاید اولان شعرلردیر… بو سببدن بورادا شرح اولونان شعرلری، آدینی چکدییم کتابین بیر نوع کامل‌لشمه‌سینه ده یاردیم ائده بیلر»
اثرده گیریش»دن علاوه، آیدینلانما شاعری «معجز شبستری»، «حیدربابایا سلام» اثری‌نین دراماتیک یؤنلری، «حیدربابایا سلام» اثری‌نین ایکی بندی اوزرینه تحلیل، ملی ایدئیانین پوئتیک ایفاده‌سی (بولود قاراچؤرلو سهندین «شهریارا مکتوب» شعرینین تحلیلی)، شهریارین «سهندیه» زیروه‌سی، شمع ایله پروانه‌نین ملی فورماسی (دکتر زهتابی‌نین «پروانه‌نین سرگذشتی» اثری)، سئوگی‌نین بویالاری (دکترحمید نطقی‌نین «هر رنگ‌دن» شعرینین تحلیلی)، لحظه‌لر شعری (مفتون امینی‌نین «عاشیقلی کروان» اثری‌نین تحلیلی)، «باریشماز» معلمین محکمه اوتاغیندا («گولنده هر زامان» اثری‌نین تحلیلی)، «نادر الهی» شعرینده ایفاده اوبرازلیغی (شعرلری‌نین تحلیلی)، یئلکن‌سیز گمی («ح.ر.سحر» خانیمین «گمی» شعرینین تحلیلی) یازیلاری یئر آلیر.
همت شهبازی‌نین بو یئنی اثری، تبریزین «اختر» یاییم ائوی طرفیندن یاییلیبدیر.
قایناق:ایشیق سایتی
https://t.me/Adabiyyatsevanlar
Post #30152
943