#فولکلور_گونوموز
«آندین ایکی باشی اولور»

سورو داغدان آرانا ائنیر. قاباق قولونون بیری قیریلمیش قارا قویون آرخاجدا (ایلین ایستی واخت‌لاریندا چؤل‌ده مال-قارانین استراحت یئری) قالیر. ائله بیلیر صاحیبی سورونو ساغینا گتیرنده اونو بورادا گؤره‌جک، سینیقچی گتیریب قولونو ساریتدیراجاق.
قویون بیر ده گؤرور، اوبا کؤچوب یوردو قالیر. یورد یئرینده بیر جاناوار هرلَنیر. ایسته‌ییر بیر تَهَر آرادان چیخسین. گؤرور یوخ، جاناوار اونا ساری گلیر. جاناوارین پنجه‌سیندن هارا قاچا بیلردی، ترپنمه‌ییب، دئییر: بلکه منه بئله گلیر، منی هئچ گؤزو آلماییب، من قارا، آرخاج قارا، بیر آز سومسونوب، اؤتوب کئچه‌جک. آنجاق جاناوار دوز اونون اوستونه گلیر. قویونون قاباغیندا دایانیر، اونو دانلاماغا باشلاییر.
- منیم یوردومدا نه گزیرسن؟
قویون دئییر: ـ بورا آتا-بابادان بیزیم یورددو.
جاناوار دئییر: - سن منی نئجه ایناندیرا بیلرسن کی، بورا سیزین یورددو؟
قویونون دیلی گوده‌لیر، آخی صاحیبی‌نین هئچ اولماسا بیر آتی، یا دا بیر اولاغی بوردا اولسایدی، او، قویونون سؤزونو تصدیق ائدردی. ایندی قویون لاپ یوز دفعه آند ایچسین. آمان ائله‌سین، جاناواری ایناندیرا بیلرمی؟
قویون دئدی:
- بس سن نئجه ایناندیرارسان کی، بورا بیزیم یوخ، سیزینکی‌دیر؟
جاناوار اؤیونه-اؤیونه دئییر:
- بو ساعات بورا یوز شاهید ییغارام.
جاناوار بئله دئییب داغین دالینا آشیر کی، تولکودن، چاققالدان بیرینی تاپیب گتیرسین، شاهیدلیک ائله‌تدیرسین.
بو زامان قارا قویونو سوروده گؤرمه‌ین بوْزدار گئری دؤنور، اؤزونو آرخاجا سالیر.
قویون اونو گؤروب اورک‌‌لَنیب دئییر:
- سن گئت، او قایانین آلتیندا گیزلن، من اؤسکورنده چیخارسان، بوزدار همین یئرده گیزلنیر. جاناوار تولکونو گتیریب گلیر‌.
تولکو چاتان کیمی قویونو هده‌لَمه‌یه باشلاییر:
- من گؤزومو بوردا آچمیشام، رحمت‌لیک بابام بورالاری منه گؤستریب دئیردی کی، گؤردویون یئرلر جاناوارین یوردودو، من بو جاناواری همیشه بوردا گؤرموشم.
قویون تولکویه دئییر:
- ایندی کی بئله‌دیر، گئت، چیخ او قایانین باشینا، اوزونو گؤیه توتوب آند ایچ، دئ کی، اگر یالاندان آند ایچسم، شیرین جانیمدان خئیر گؤرمه‌ییم‌.
تولکو گئدیب همین قایانین باشینا قالخیر، قاباقجا آشاغی باخیر، گؤرور کی، بوْزدار اونو بوغازلاماغا حاضیرلاشیر. آما قویونون هیمنینی گؤزله‌ییر. تولکو اوندان اوزاقلاشماغا باشلاییر. جاناوار سوروشور:
- نییه آند ایچمیرسن؟
تولکو اونا جواب وئریر:
- آندین ایکی باشی اولور. دوشر-دوشمزیندن قورخورام. گل اؤزون آند ایچ. قویون آندا اینانیر‌.
جاناوار قایانین باشینا قالخار-قالخماز قویون اؤسکورور، بوْزدار تئز یئریندن سیچراییب جاناوارین خیرتده‌ییندن یاپیشیب اؤلدورور.
قاچا-قاچا گئدن تولکو هله ساغ حساب ائله‌دییی جاناوارا ائشیتدیرمک ایسته‌ییر:
- سنه دئمه‌دیم آندین ایکی باشی اولور؟!

#جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی
تصحیح و تحشیه: #حسن_اوموداوغلو
#ادبیات_ائوى
@Adabiyatevi