Песнь 7

Петру

Ми́лостивному, Боже́ственным про́мыслом Христо́вым наказу́емь, подо́битися попуще́н был еси́, пре́жде стра́сти, Пе́тре, отверже́ния подпа́сти волне́нию.

Тебе́ Христо́с, первозва́нному и зело́ возлю́бленному, я́ко председа́телю благосла́вну апо́столов, пе́рвому явля́ется, воскре́с от гро́ба.

Твое́ трикра́тное, е́же пре́жде стра́сти, исцеля́я отверже́ние, Влады́ка трикра́тным боговеща́нным, Пе́тре, вопроше́нием утвержда́ет любо́вь.

Е́же ко Христу́, Пе́тре, любле́ния, предлага́л еси́ свиде́теля и Всеви́дящаго я́ко Бо́га Сло́ва, те́мже и люби́мое вруча́ет тебе́ ста́до.

Павлу

Бы́сть, Христе́, печа́ть и вене́ц апо́столов Твои́х, и́же напосле́док зва́нный време́н, тща́нием же всех превозше́д, с ни́мже лю́дие церко́внии пою́т Тебе́: оте́ц на́ших Бо́же, благослове́н еси́.

А́ще и гони́в пе́рвее Це́рковь Твою́ Па́вел у́зник, но премину́ дре́внюю де́рзость Твое́ю ре́вностию последи́. Собра́ бо, Христе́, язы́ки, зову́щия: оте́ц на́ших Бо́же, благослове́н еси́.

Ты из Иерусали́ма пропове́дав всем Ева́нгелие, объя́т же о́крест всю зе́млю, Па́вле, да́же до коне́ц Иллири́ка, уча́, взыва́л еси́: оте́ц на́ших Бо́же, благослове́н еси́.

Во у́жасе взят быв, тре́тие дости́гл еси́ Не́бо, пребога́те, и, услы́шав неизглаго́ланная словеса́, вопие́ши: сла́ва превы́шнему Отцу́ и Сы́ну, сия́ние же сопресто́льно испыта́ющаго я́ве Ду́ха Бо́жия глубины́.
👇👇👇