📚 Вазорати маориф: омӯзгоронро ба ҷамъоварии пул, обуна ва фурӯши чипта ҷалб кардан манъ аст

Вазорати маориф ва илми Тоҷикистон аз роҳбарони соҳаи маориф талаб кардааст, ки омӯзгоронро ба корҳои берун аз раванди таълиму тарбия ҷалб накунанд ва аз ҷамъоварии ғайриқонунии маблағ пешгирӣ намоянд.

Ин талаб дар номаи вазорат аз 2 октябри соли 2026 зикр шуда, ба роҳбарони раёсатҳои маорифи Душанбе, вилоятҳои Суғду Хатлон ва шуъбаҳои маорифи шаҳру ноҳияҳо ирсол шудааст. Дар ҳуҷҷат ба банди 2 моддаи 11 Қонуни «Дар бораи мақоми омӯзгор» истинод шудааст.

Тибқи нома, омӯзгорон набояд ба хариду фурӯши либоси мактабӣ, ҷамъоварии маблағ, обуна ба рӯзномаву маҷаллаҳои ғайритахассусӣ, фурӯши чиптаҳои чорабиниҳои фарҳангиву фароғатӣ ва корҳои кишоварзӣ ҷалб карда шаванд.

Вазорат ҳамчунин таъкид кардааст, ки аз маоши омӯзгорон маблағ ҷамъоварӣ кардан манъ аст. Аз ҷумла, роҳбарони муассисаҳои таълимӣ ҳақ надоранд барои обуна ба рӯзномаву маҷаллаҳо, хариди чиптаҳои чорабиниҳои фарҳангӣ, ободонии мактаб, хариди маводи таълимӣ, методӣ ва ороишӣ, воситаҳои техникӣ ва дигар лавозимот аз омӯзгорон пул талаб кунанд.

📲 Your.tj дар ➡️ Telegram / Facebook / Instagram / TikTok / Threads