Як донишҷӯи Донишгоҳи кӯҳиву металлургии Бӯстон бо гумони корд задани ҳамкурсаш боздошт шуд

ВКД Тоҷикистон аз боздошти донишҷӯи соли якуми Донишгоҳи кӯҳиву металлургии шаҳри Бӯстон хабар дод, ки ба корд задани ҳамкурсаш гумонбар мешавад.

Ба иттилои вазорат, Алишер Ҳакимови 18-сола, сокини ҷамоати Хистеварзи ноҳияи Бобоҷон Ғафуров, рӯзи 24 сентябр тақрибан соати 10:00 дар назди кӯли шаҳри Бӯстон бо ҳамкурси худ Акбархоҷа Саодатзода, сокини ҷамоати Оббурдони ноҳияи Мастчоҳ, муноқиша кардааст.

Гуфта мешавад, Ҳакимов бо истифода аз корди хоҷагӣ ба Саодатзода ҷароҳати вазнин расонидааст.

Дар робита ба ин ҳодиса нисбати Ҳакимов бо гумони қасдан расонидани зарари вазнин ба саломатӣ тибқи моддаи 110 Кодекси ҷиноятӣ парвандаи ҷиноӣ оғоз шудааст. Ин модда аз 5 то 15 соли маҳрум сохтан аз озодиро пешбинӣ мекунад.

Ангезаи муноқиша ва назари ҳар ду тараф маълум нест. Вазорат ҳамчунин дар бораи вазъи саломатии Саодатзода маълумот надодааст.

📲 Your.tj дар ➡️ Telegram / Facebook / Instagram / TikTok / Threads