📌 Дар Тоҷикистон то ҳол танҳо 17,3%-и нақшаи солонаи пахта ҷамъоварӣ шудааст

То 20 сентябр дар Тоҷикистон 68,2 ҳазор тонна пахта ҷамъоварӣ шудааст, ки ҳамагӣ 17,3%-и нақшаи солона мебошад. Дар ҳамин давраи соли гузашта ҳаҷми ҷамъоварӣ ба 142,8 ҳазор тонна расида буд.

Тибқи иттилои Asia-Plus бо истинод ба Вазорати кишоварзӣ, нишондиҳандаи имсола нисбат ба соли гузашта 74,6 ҳазор тонна ё 52,2% камтар аст.

Дар соли 2026 ҷамъоварии 394,7 ҳазор тонна пахта аз майдони 164,8 ҳазор гектар ба нақша гирифта шудааст. Танҳо рӯзи 20 сентябр 5,3 ҳазор тонна пахта ҷамъоварӣ шуда, дар корҳои саҳроӣ беш аз 92,7 ҳазор нафар иштирок доранд.

Соли 2025 дар кишвар 392,2 ҳазор тонна пахта ҷамъоварӣ шуда буд.

Дар бархе шаҳру ноҳияҳо суръати ҷамъоварӣ паст буда, иҷрои нақша дар онҳо аз 10% камтар аст. Ба хоҷагиҳо тавсия шудааст, ки аз ҳавои мусоид самаранок истифода бурда, техникаву коргарони иловагӣ ҷалб ва ҳосили ҷамъоваришударо сари вақт ба нуқтаҳои қабул расонанд.

Дар ҳамин ҳол, Тоҷикистон асосан нахи пахта содир мекунад. Соли 2025 аз кишвар тақрибан 93 ҳазор тонна нахи пахта ба маблағи 142,1 млн доллар содир шудааст. Ҳаҷми содироти риштаи пахтагӣ 11,24 ҳазор тонна ба маблағи 25,05 млн доллар ва матоъву маҳсулоти тайёр 3,25 ҳазор тонна ба маблағи 9,45 млн долларро ташкил додааст.

Дар доираи Барномаи давлатии рушди инноватсионии пахтакорӣ барои солҳои 2026–2030 истифодаи технологияҳои муосир, обёрии қатрагӣ ва зиёд кардани коркарди пахта дар дохили кишвар пешбинӣ шудааст.

📲 Your.tj дар ➡️ Telegram / Facebook / Instagram / TikTok / Threads