Услубий хатоликлар

Хатоликлар турли хил бўлади. Сўзларни нотўғри танлаш ва ноўрин ишлатиш; матнда аниқлик, лўндалик ва ифодалилик талабларини бузиш услубий хатолик дейилади.

Мисол учун:
1. Оёғи билан тепди — маълумки, қўли ёки бошқа жойи билан тепиб бўлмайди. Тепиш сўзи айнан оёқ билан зарб беришни назарда тутади.

2. Мебель дўконидан қизил дарахтдан ясалган ёғоч стол сотиб олдим — дарахтдан ясалганидан кейин, темир стол бўлиб қолмайди-ку, албатта ёғоч стол бўлади.

3. Ишчилар қисқа муддат давомида тракторни тузатиш ишларини амалга ошириш бўйича қарор қабул қилдилар. — бу гапда ортиқча сўзлар кўпайиб кетган ва гап мураккаблашган. Бу гапни оддийгина қуйидагича ифодалаш мумкин: Ишчилар қисқа муддатда тракторни тузатишга қарор қилдилар.

—

Тилда турли услублар бўлади:
- сўзлашув нутқи услуби;
- илмий услуб;
- расмий ҳужжатлар услуби;
- публицистик услуб;
- бадиий услуб.

Ҳар бир услубнинг ўзига хосликлари бор. Бир услубга оид сўзларни иккинчи услубда ишлатиш ҳам услубий хатолик ҳисобланади.

Мисол учун:
Расмий маълумот: Ички ишлар органлари ходимлари гапга қулоқ солмайдиган қайсар мухбирни ўз хизмат машиналарига зўрға улоқтириб, тергов бўлимига судраб келдилар — бу гапда кўриб турганингиздек, расмий баёнотда оғзаки ва бадиий нутқдаги сўзлар қўлланган.

@xatoliklar