❗️46 краін і ЕС асудзілі Беларусь за ваенную падтрымку Расіі ў ААН

Еўрапейскі саюз і 46 дзяржаў выступілі з сумеснай заявай на дэбатах Першага камітэта Генеральнай Асамблеі ААН, асудзіўшы працяг ваеннай падтрымкі Расіі з боку Беларусі. Сярод саюзнікаў Крамля ў дакуменце таксама названыя Іран і Паўночная Карэя.

Падпісанты асудзілі расійскія ўдары па ўкраінскіх гарадах і энергетычнай інфраструктуры, якія прыводзяць да гібелі мірных жыхароў і пагаршаюць энергетычную бяспеку напярэдадні зімы. Яны заклікалі Маскву да поўнага і безумоўнага спынення агню, а таксама вываду ўсіх расійскіх войскаў і ваеннай тэхнікі з міжнародна прызнанай тэрыторыі Украіны.

Тым часам прадстаўнікі Мінска на міжнародных пляцоўках працягваюць ускладаць адказнасць за вайну на Захад і Украіну. Аднак факты ўдзелу Беларусі ў расійскай агрэсіі застаюцца: у 2022 годзе тэрыторыя краіны выкарыстоўвалася для нападу на Украіну, а беларускія прадпрыемствы працягваюць супрацоўнічаць з расійскім ваенна-прамысловым комплексам.