✅Anqara shahrida O‘zbekiston Respublikasi Investitsiyalar, sanoat va savdo vazirligi hamda Turkiya Respublikasi Savdo vazirligi o‘rtasida savdo masalalari bo‘yicha ishchi guruhning ikkinchi yig‘ilishi bo‘lib o‘tdi.
✅Mazkur yig‘ilishda O‘zbekiston Respublikasi Vazirlar Mahkamasi huzuridagi Texnik jihatdan tartibga solish agentligi mas’ullari ham ishtirok etdi.
Muzokaralar davomida ikki mamlakat o‘rtasidagi o‘zaro tovar ayirboshlash hajmini 5 milliard AQSh dollariga yetkazish, mavjud tarif va notarif to‘siqlarni bartaraf etish hamda mahsulotlarning har ikki mamlakat bozorlariga kirishini soddalashtirish masalalari muhokama qilindi.
Shuningdek, qishloq xo‘jaligi, elektrotexnika va yengil sanoat kabi o‘zaro savdoni kengaytirish uchun yuqori salohiyatga ega ustuvor tarmoqlardagi hamkorlikni rivojlantirishga alohida e’tibor qaratildi.
✅Yig‘ilish doirasida texnik jihatdan tartibga solish, standartlashtirish va mahsulotlar muvofiqligini baholash sohalaridagi hamkorlik istiqbollari ham ko‘rib chiqildi. Xususan, muvofiqlik sertifikatlarini o‘zaro tan olish hamda bojxona tartib-taomillarini soddalashtirish imkoniyatlari yuzasidan fikr almashildi.
✅Elektrotexnika mahsulotlariga qo‘yiladigan texnik talablar va ularning muvofiqligini baholash bilan bog‘liq masalalarni tezkor hal etish maqsadida tomonlar soha mutaxassislaridan iborat texnik ishchi guruhni shakllantirishga kelishib oldilar.
✅Bundan tashqari, O‘zbekiston va Turkiya o‘rtasidagi Imtiyozli savdo to‘g‘risidagi bitimning kengaytirilgan tahririni imzolash bo‘yicha texnik maslahatlashuvlar o‘tkazildi.
✅Yig‘ilish yakunida erishilgan kelishuvlarni mustahkamlash maqsadida Savdo bo‘yicha ishchi guruh yig‘ilishining bayonnomasi imzolandi.
🌐 standart.uz | 😎 Facebook | 😎Instagram | 😎YouTube