Qoraqalpog'istonning Qoratau maydonida yangi gazkondensat koni ochildi

Ustyurt hududining markaziy qismida joylashgan Qoratau maydonida olib borilgan geologiya-qidiruv ishlari natijasida yangi gazkondensat koni ochildi. Bu haqida "O‘zbekneftgaz" AJ ma'lum qildi.

Qoraqalpog‘iston Respublikasi Mo‘ynoq tumanidagi maydonda 1-sonli izlov qudug‘i 4860 metr chuqurlikkacha burg‘ilandi. 3-oktyabr kuni quyi yura qatlamlarining 3273–3213 metr chuqurlik oralig‘ida sanoat ahamiyatiga ega tabiiy gaz va kondensat oqimi olindi.

Rejaga ko‘ra, yil yakuniga qadar 2-sonli izlov qudug‘ini burg‘ilashni yakunlash, shuningdek, 3 va 4-sonli izlov-qidiruv quduqlarida ishlarni boshlash rejalashtirilgan.

Qayd etilishicha, mazkur natija Ustyurt hududida chuqur qatlamlarni o‘rganish bo‘yicha yangi istiqbolli yo‘nalishlarni belgilash imkonini beradi.

Telegram | Instagram | Facebook | YouTube | Website