Doktorantura yo‘nalishida yangi ilmiy hamkorlik

O‘zbekiston Respublikasi Fanlar akademiyasi, Alisher Navoiy nomidagi Davlat adabiyot muzeyi bilan O‘zbekiston jurnalistika va ommaviy kommunikatsiyalar universiteti o‘rtasida tadqiqotchilar va doktorantlarning qo‘shma ilmiy faoliyatini rivojlantirishga qaratilgan hamkorlik yo‘lga qo‘yildi.

Hamkorlik doirasida muzey tadqiqotchilari hamda universitetning tadqiqotchi va doktorantlari bilim va tajriba almashib, qo‘shma ilmiy izlanishlar olib bormoqda. Universitetda hamkorlikdagi seminar-treninglar har hafta muntazam tashkil etilib, tadqiqot metodologiyasi, ilmiy maqola tayyorlash va natijalarni xalqaro ilmiy hamjamiyatga taqdim etish masalalari muhokama qilinmoqda.

Xususan, Scopus bazasida indekslanadigan jurnallar uchun maqolalar tayyorlash, qo‘lyozmalarni jurnal talablariga moslashtirish va tahririyatga yuborish bo‘yicha amaliy tajribani oshirishga alohida e’tibor qaratilmoqda. Ilmiy loyihalar ustida birgalikda ishlash ham hamkorlikning muhim yo‘nalishlaridan biridir.

Manbashunoslik, qadimiy qo‘lyozmalar, mumtoz adabiyot, madaniy eksponatlar va san’atga oid tadqiqotlarni media bilan uyg‘unlashtirish yangi izlanishlar uchun keng imkoniyat yaratadi. Ilmiy meros va tadqiqot natijalarini zamonaviy media formatlari orqali keng auditoriyaga yetkazish ham ko‘zda tutilgan.

Ushbu hamkorlik doktorantlarning ilmiy salohiyatini oshirish va adabiy-madaniy merosni zamonaviy yondashuvlar asosida o‘rganishga xizmat qiladi.
———————————————

😃 O‘zJOKU matbuot xizmati: @uzjmcu